Almatylyq ǵalymdar men stýdentter Elbasynyń ókilettigin uzartý jónindegi referendýmdy qoldady
ALMATY. 29 jeltoqsan. QazAqparat /Erbol Turymbetov/ - Búgin Almatyda Qazaq ulttyq agrarlyq ýnıversıtetinde elimizdiń Tuńǵysh Prezıdentiniń ókilettiligin 2020 jyldyń 6 jeltoqsanyna deıin uzartý týraly boıynsha referendým ótkizý jónindegi bastamany qoldaý maqsatynda jınalys ótti.
Oǵan Almaty qalasyndaǵy birqatar JOO rektorlary men tanymal tulǵalar qatysty. QR Ulttyq Ǵylym akademııasynyń prezıdenti, akademık Murat Jurynov óz sózinde Elbasynyń Qazaqstandy qıyn-qystaý kezeńderden, álemdik daǵdarystan utymdy alyp shyqqanyn aıta otyryp, qarqyndy damý jolyndaǵy Qazaqstan basshysynyń oń isterine ári qara qoldaý bildirýge shaqyrdy. «Táýelsizdiktiń aldyńǵy jyldary, odan bólek, ıadrolyq qarýdan bas tartyp, álemde beıbitshiliktiń ozyq úlgisin tanytýy, sondaı-aq, elimizdiń búgingideı deńgeıge kóterilýinde Prezıdentimizdiń eńbegi eren. Sondyqtan, osy baǵytty, osy qarqyndy jalǵastyra berý úshin Elbasynyń ókilettiligin arttyrý búginginiń ózekti máselesi»,- dedi M. Jurynov.
Esterińizge sala keteıik, osy jyldyń 23 jeltoqsanynda Óskemende ótken respýblıkalyq basqosýda bastamashy top elimizdiń Tuńǵysh Prezıdenti - N. Nazarbaevtyń prezıdenttik ókilettiligin 2020 jylǵy 6 jeltoqsanǵa deıin uzartý maqsatynda referendým ótkizý týraly usynys aıtqan edi.
Jıyn sońynda Tuńǵysh Prezıdentimizdiń ókilettiligin uzartýdy qoldaýǵa baılanysty Qarar qabyldandy.
Onda «...Tuńǵysh Prezıdentimizdiń bastamasymen eldiń ındýstrıaldy-ınnovatsııalyq damý jáne basqa da tarıhı baǵdarlamalary qabyldandy. Biz osy baǵdarlamalardyń Elbasynyń jetekshiligimen júzege asqanyn qalaımyz. ...Biz barlyq ǵylymı jáne stýdenttik orta ókilderin Elbasynyń prezıdenttik ókilettiligin 2020 jylǵy 6 jeltoqsanyna deıin uzartý jónindegi referendýmdy qoldaýǵa shaqyramyz», - delingen.
