Almatylyq fýtbolshylar Premer-Lıgadaǵy el chempıonatynda 11-inshi orynda kele jatyr
ALMATY. 27 tamyz. QazAqparat - Keshe elimizdiń 7 qalasynda fýtboldan Premer-Lıgadaǵy komandalar arasynda Qazaqstan chempıonatynyń 21-inshi týry ótti.
Onda 3:0 esebindegi eń joǵarǵy esep Pavlodarda «Ertis» pen Taldyqorǵannyń «Jetisý» aıaqdopshylary arasyndaǵy oıynda tirkeldi. Kókshetaýdyń «Oqjetpesi» men Qyzylordanyń «Qaısar», Qostanaıdyń «Tobyly» men «Aqtóbe» 2:2, Oraldyń «Aqjaıyǵy» pen Shymkenttiń «Ordabasy» 1:1 esebimen tarasty. Almatynyń «Qaıraty» «Tarazdy» 2:1, «Atyraý» Qaskeleńniń «Suńqaryn» 1:0 esebimen jeńdi. Tek Qaraǵandynyń «Shahteri» ǵana óz alańynda Astananyń fýtbolshylarynan 0:1 esebimen jeńilis tapty. Qazir týrnır kestesinde 21 oıynnan keıin 41 upaımen «Shahter» men «Tobyl» kósh bastap kele jatyr. Olardan 2 upaıy kem pavlodarlyqtar úshinshi orynda tur. Al 1 oıyny kem astanalyqtar 37 upaımen tórtinshi orynda bolsa, tarazdyqtar 21 oıynnan soń 5 upaımen úzdik bestikti túıindeýde. Aqtóbelikterdiń qorjynynda 19 kezdesýden keıin 32 upaı bolsa, olardan bir upaı artyq shymkenttikterde - 30, oraldyqtarda - 28 upaı bar. 21 týrdan soń atyraýlyqtar - 25, qyzylordalyqtar - 24 upaımen 9-10 orynda keledi. Al 11-orynda 20 kezdesýden soń 22 upaımen almatylyqtar on birinshi tursa, odan bir oıyny artyq qaskeleńdikter 21 upaımen on ekinshi, taldyqorǵandyqtar 18 upaımen on úshinshi, kókshetaýlyqtar 8 upaımen on tórtinshi orynǵa taban tiredi.
