Almatylyq fýtbolshylar Noılengbahta áıelder arasyndaǵy ÝEFA chempıondar lıgasynyń 1/16 satysyndaǵy qarymta kezdesýin ótkizedi
ALMATY. 4 qazan. QazAqparat /Erlik Erjanuly/ - 5 qazan kúni Avstrııanyń Noılengbah qalasyndaǵy "Vınervaldshadıon" stadıonynda jergilikti "Noılengbah" pen Almatynyń "SShVSM-Qaırat" komandalary
áıelder arasynda ÝEFA chempıondar lıgasynyń 1/16 satysyndaǵy qarymta kezdesýlerin ótkizedi. Alań ıeleri bul joly ese qaıtarýǵa bar kúshin jumsamaq. Avstrııa chempıonaty men Avstrııa kýbogyn 2 márte ıelengen bul komanda alǵashqy kezdesýde 28 qyrkúıekte Almatynyń ortalyq stadıonynda 2:1 esebimen jeńilis tapqan edi. Endi Natalıa Doroshevanyń shákirtteri syrt alańda da mereıi ústem shyǵatyn bolsa, jarystyń kelesi satysyna joldama alady. Onda olar Italııanyń "Tavanıakko" jáne Shvetsııanyń "Malme" komandalary arasyndaǵy kezdesýdiń jeńimpazymen kezdesedi. Chempıondar lıgasynyń 1/8 fınaldyq oıyndaryna ótken 16 komandanyń bul saıysy 2-3 jáne 9-10 qarashada bolady. Odan keıin shırek jáne jartylaı fınaldar 2012 jyldyń kókteminde, al aqtyq saıys 17 mamyrda Mıýnhende ótedi. Almatylyqtar byltyr bul dúbirly dodanyń 1/16 satysynan óte almaǵan edi. Onda olardyń jolyn Chempıondar lıgasynyń 2008/2009 jylǵy maýsymynyń jeńimpazy sanalatyn Germanııanyń "Dýısbýrg" aıaqdopshylary kesken bolatyn.
