Almatylyq er azamattar «úlgili áke» ataný úshin synǵa tústi

Baıqaýǵa kópbalaly ákelermen qatar jas ári belsendi, sportshy, ardager ákeler qatysyp, ónerlerin ortaǵa saldy. Saıysqa qatysý úshin qalanyń ár aýdanynan kelgen januıalardyń ulttyq qundylyqtar týrasyndaǵy bilimi men biligi synǵa tústi.

«Qalalyq ákeler sleti» osymen bıyl 5-shi ret ótkizilýde. Saıystyń basty maqsaty - bala tárbıesindegi ákeniń rólin kúsheıtip, ult bolashaǵy úshin ata-ananyń jaýapkershiligin arttyrý, ákeniń atqarar róli otbasyn asyrap, nan tabýmen ǵana shektelgen zamanda onyń tárbıedegi negizgi ornyn aıqyndaý. Áke mahabbaty men qamqorlyǵy urpaǵynyń sanaly bolyp ósýine septigin tıgizedi» -deıdi №1 oqýshylar úıiniń dırektory Dáýirhan Qojahmetov.

Baıqaý birneshe kezeńnen turdy.  «Taǵylym» kezeńinde  qatysýshylar tól tarıhymyzǵa, salt-dástúrimizge, ulttyq mádenıetimizge qatysty suraqtarǵa jyldam jaýap berý synynan ótti.
 

 «Jubaıym, eki balam, kelinim men nemerem - búkil otbasym meni qoldap kelip otyr. Biz Túrksib aýdanynyń namysyn  qorǵaımyz ári jeńisten dámelimiz. Babalarymyzdyń ómir salty jaıyndaǵy bilgen-túıgenim meni jerde qaldyrmaıdy.  Al 4 jastaǵy nemerem bolsa kórermender qurmetine qazaq ultynyń bıin bıleıdi»,- deıdi baıqaý qatysýshysy Qarlyǵash Seıitov. 

Kelesi aınalymda qazylar alqasy ata-analardyń zerektigin baǵalasa, saıys sońynda ár áke balasymen birge án salý, bı oryndaý, túrli aspaptarda oınaý qabiletin pash etti.
 

«Meniń 5 balam bar. Bul saıysqa 10 jastaǵy kishi qyzymdy ertip keldim. Buryn jumysbasty bolǵanym sonshalyq úlken balalarymnyń qalaı óskenin de baıqamaı qalyppyn. Al qazir kóp ýaqytymdy kenjemmen ótkizýge arnap, onyń tárbıesin qadaǵalap júrmin. Qyzymdy mýzykalyq mektepke aparamyn, onda fortepıanoda oınaýǵa mashyqtanýda. Jáne kórkem gımnastıkaǵa qatysyp júrmiz»-deıdi kópbalaly áke Muhıt Dosymbetov.

Baıqaý jeńimpazdary respýblıkalyq baıqaýǵa joldama alady.

 

Avtory:  Araılym Joldasbaeva