Almatylyq epıdemıolog halyqty Qurban aıt merekesinde toptasyp jınalmaýǵa shaqyrdy

ALMATY. QazAqparat - Almaty qalasy sanıtarlyq-epıdemıologııalyq baqylaý departamenti basshysynyń orynbasary Qarlyǵash Ábdijabbarova brıfıng barysynda turǵyndardy Qurban aıt merekesi kezinde sanıtarlyq normalardy saqtaýǵa shaqyrdy, dep habarlaıdy QazAqparat tilshisi.

Departament ókiliniń aıtýynsha, Almaty qalasyndaǵy epıdemıologııalyq jaǵdaı nasharlaı túsýde.

«Maýsym aıynda mamyrmen salystyrǵanda aýrý deńgeıi 6,3 esege artty (94-ten 595 jaǵdaıǵa deıin). Táýligine KVI-diń 100-den 200-ge deıin jaǵdaıy tirkeledi. Aǵymdaǵy jyldyń 3 shildesinen bastap DSM epıdemıologııalyq jaǵdaıdy baǵalaý matrıtsasynda qala «sary aımaqta» tur. 2022 jyldyń 6 aıynda qalada koronavırýs 55 441 adamnan, shildede 773 turǵynnan anyqtaldy», - deıdi Qarlyǵash Ábdijabbarova.

Spıkerdiń sózinshe, mundaı jaǵdaıda saqtyq sharalaryn umytýǵa bolmaıdy.

«Biz Qurban Aıt merekesi kezinde qurbandyq shalý rásimderi ótetin jerlerde jáne meshitterde barlyq turǵyndarǵa maska taǵýdy usynamyz, ásirese adamdar kóp jınalatyn jabyq úı-jaılarda. Áleýmettik qashyqtyqty saqtaý, qoldy jıi jýý, adamdar kóp jınalatyn oryndarǵa barmaý mańyzdy», - dedi ol.

Sondaı-aq, epıdemıolog maldy avtokólikterden jáne jeke úı ıelikterinen satýǵa tyıym saldy.

«Mal soıýdy uıymdastyrý jáne mal satý veterınarııalyq qyzmettiń resmı veterınarııalyq-sanıtarııalyq qorytyndysyn alǵan soıý pýnktteri men alańdarda (veterınarııalyq qyzmet bekitken tizbege sáıkes soıý pýnktteri, aýdandardaǵy alańdar) júrgizilýi tıis. Mal soıý tek veterınarııalyq anyqtama bolǵan jaǵdaıda ǵana júrgizilýi kerek», - dedi spıker.