Almatylyq emdeý uıymdary 1,3 mlrd teńgeniń qyzmetin durys kórsetpegen
ALMATY. QazAqparat - Almaty turǵyndaryna bıylǵy jyldyń toǵyz aıynda kórsetilgen medıtsınalyq kómek sapasyn baqylaý barysynda 1,3 mlrd teńgeniń qyzmeti durys kórsetilmegeni anyqtaldy. Bul týraly «Áleýmettik medıtsınalyq saqtandyrý qory» KEAQ Almaty fılıaly málim etti, dep habarlaıdy QazAqparat tilshisi.
Medıtsınalyq qyzmet sapasyn baqylaý bóliminiń jetekshisi Ásem Manapbaevanyń aıtýynsha, kemshiliktiń basym bóligine konsýltatıvtik-dıagnostıkalyq kómek kórsetetin klınıkalar tarapynan jol berilgen.
Jalpy, konsýltatıvtik-dıagnostıkalyq kómek boıynsha 45 myńnan astam qyzmet durys kórsetilmegen. Nátıjesinde 80 mln teńge qaıtaryp alyndy.
Aqaýmen kórsetilgen 5,8 myń qyzmet – statsıonarlar men statsıonardy almastyratyn kómek uıymdaryna tıesili. Jibergen kemshilikteri úshin medıtsınalyq mekemeler 1,2 mlrd teńgeden astam aıyppul tóledi.
Al, kemshilikterge jol bergen emhanalar Qorǵa 60 mln teńge qaıtardy.
«Monıtorıng barysynda anyqtalǵan kemshilikterdiń deni emdeý-dıagnostıka barysynda belgilengen standarttardan aýytqý, medıtsınalyq qujattardy durys toltyrmaý, qyzmet baǵasyn negizsiz ósirý syndy olqylyqtarǵa kelip saıady. Sonymen qatar, «kórsetildi» dep jazylǵan belgili bir qyzmet túrleriniń shyn máninde kórsetilgenin rastaı almaǵan klınıkalar da bar», – dedi Ásem Manapbaeva.
Áleýmettik medıtsınalyq saqtandyrý qory kórsetilgen qyzmet sapasyna turaqty baqylaý júrgizip otyrady.
Kórsetilgen qyzmet aqysy tyńǵylyqty tekserýden keıin tólenedi.
Buǵan deıin habarlanǵandaı, qaıtaryp alynǵan qarajat medıtsınalyq kómektiń ózge túrlerine jumsalady.
