Almatylyq dárigerler júrek qaǵysy buzylǵan naýqastarǵa kardıomonıtor ornatýdy qolǵa aldy
ALMATY. QazAqparat- Almatydaǵy №7 qalalyq klınıkalyq aýrýhanasynyń arıtmologtary júrek qaǵysy buzylǵan naýqastardy emdeýdiń biregeı ádisin qoldanysqa engizdi, dep habarlaıdy QazAqparat tilshisi.
Emdeý mekemesiniń baspasóz qyzmeti málim etkendeı, dárigerler júrek qaǵysy buzylǵan naýqastarǵa kardıomonıtor ornatýdy qolǵa aldy. Jańa ádisti aýrýhananyń ınterventsıondyq kardıohırýrgııa jáne arıtmologııa bólimshesinde arıtmolog Qanat Ergeshev qoldanysqa engizdi.
Júrektiń túrli aqaýlaryn anyqtaıtyn dıagnostıkalyq apparat alǵash ret 21 jastaǵy patsıentke ornatyldy.
Jas jigit №7 aýrýhanaǵa bas aınalý, bas aýrýy, álsizdik, esinen taný syndy belgilermen túsken.
«Naýqasty jan-jaqty tekserdik, holter qoıdyq. EKG-holter zertteýleri de júrek qaǵysynda aıtarlyqtaı aqaý joq degen nátıje berdi. Sodan soń júrek ishin elektrofızıologııalyq zertteý ádisimen tekserdik, ol da eshteńe kórsetpedi. Mundaı jaǵdaılarda patsıentterge Reveal qondyrǵysyn ornatyp, úıine jiberemiz», - deıdi kardıohırýrg.
Dárigerdiń aıtýynsha, kardıomonıtor teriniń astyna ornatylady. Kólemi kishigirim flesh-kartadan aspaıtyn apparat aýrýdyń júrek qaǵysyn uzaq ýaqyt boıy EKG-monıtorıng jasaýǵa múmkindik beredi.
Implantty ornatý 15 mınýt qana ýaqyt alady, operatsııa jergilikti jansyzdandyrý arqyly jasalady jáne naýqas aýrýhanada jatpaıdy. Apparat júrektiń elektr ımpýlstaryn jazyp otyrady, arıtmolog maman arnaıy baǵdarlama arqyly júrek talmasy ustaǵan kezde, adam esinen tanǵan sátte júrek qaǵysy qalaı bastalǵanyn bilip otyrady.
«Málimet qashyqtyqtan alynady, patsıentti aýrýhanaǵa aldyrtýdyń qajeti joq. Osylaısha júrek qaǵysyn 3 jyl boıy baqylaýda ustaı alamyz. Dıagnoz qoıylǵannan keıin apparatty alyp tastaý eshbir qıyndyq týdyrmaıdy. Bul apparat kúrdeli dıagnozdardy anyqtaýǵa, ary qaraı emdeý taktıkasyn aıqyndaýǵa múmkindik beredi», - dep túsindirdi Sáken Anartaev.
Aıtýynsha,atalǵan qondyrǵy jas jigitterdiń, mysaly sportshylardyń kenetten ólimine sebepker bolyp jatatyn jasyryn júrek dertterin anyqtaýǵa kómektesedi.
«Reveal apparaty júrek qaǵysynyń belgisiz sebepteri, esinen tanyp qulaý, túsiniksiz sebeptermen jıi-jıi bas aınalýy, júrek talmasy ustap esinen aıyrylý, ara-arasynda az ýaqytqa entigý, keýde qýysynyń aýyrýy, sebepsiz sharshaý syndy belgiler baıqalǵan patsıentterge ornatylady»,- dep túsindirdi dáriger.
Aıta keteıik, josparly emniń barlyq túrleri, sonyń ishinde atalǵan protsedýra MÁMS arqyly qarjylandyrylady.
