Almatylyq dárigerler júrek aqaýymen týǵan náresteni aman alyp qaldy
ALMATY. QazAqparat –Almatyda perınatologııa jáne balalar kardıohırýrgııasy ortalyǵynda júrek aqaýymen týǵan náresteni dárigerler aman alyp qaldy, dep habarlaıdy QazAqparat tilshisi.
Qalalyq qoǵamdyq densaýlyq saqtaý basqarmasynyń habarlaýynsha, dárigerler nárestege týabitken júrek aqaýy, qolqa krıtıkalyq koarktatsııasy, qarynshaaralyq qalqanyń aqaýy, joǵary ókpe gıpertenzııasy dıagnozyn qoıdy.
«Jańa týǵan jáne dúnıege kelgenine birneshe aı bolǵan nárestede qolqa koarktatsııasy óte aýyr bolýy múmkin. Bundaı jaǵdaıda tómengi bólimderdegi qan aınalymy tek arterıaldy qan aǵysy arqyly ǵana júzege asyrylady. Bul - óte qaýipti, qıyn jaǵdaı. Deneniń joǵarǵy bóligindegi júrek jetkiliksizdigi men gıpertonııa belgileri qaıta qalpyna kelmeıtin mı qan tamyrlarynyń zaqymdanýyna ákelýi múmkin. Mundaı jaǵdaıda kardıohırýrgtyń jedel kómegi sábı ómiri úshin óte mańyzdy»,– dedi dáriger Gennadıı Nıgaı.
Kardıohırýrg Gennadıı Nıgaı qolqanyń tarylý aımaǵyn joıý úshin kezeń-kezeńimen eki ret ota jasady. Birinshi kezeńde náresteniń dúnıege kelgenine 6 kún bolǵanda dáriger koarktatsııa rezektsııasyn jasap, kóldeneń anastamoz qoıdy.
«Bul ádis bir jasqa tolmaǵan balalarda qolqa koarktatsııasyn qaýipsiz túzeýge múmkindik beredi», - deıdi Gennadıı Nıgaı.
Balaǵa bir aıdan keıin qarynshaaralyq qalqa aqaýy plastıkasy boıynsha ekinshi operatsııa jasaldy. Eki otanyń árqaısysy 3 saǵatqa sozyldy.
Qazirgi ýaqytta náresteniń jaǵdaıy jaqsy, aýrýhanadan úıine shyǵarýǵa daıyndap jatyr.
