Almatylyq dárigerler júregi eki ret toqtap qalǵan 10 jasar balany aman alyp qaldy
ALMATY. QazAqparat- Almaty balalar jedel medıtsınalyq járdem ortalyǵynyń dárigerleri pıon spırt tunbasyn iship alǵan balany aman alyp qaldy,dep habarlaıdy QazAqparat tilshisi.
Balalar jedel medıtsınalyq járdem ortalyǵy baspasóz qyzmetiniń málimetinshe, 10 jasar Dastan taýshymyldyq (pıon) spırt tunbasyn sýmen shatastyryp iship qoıǵan.
Biraz ýaqyttan keıin balanyń densaýlyǵy nasharlap, esinen tanyp qalǵan. Jedel járdem brıgadasy naýqasty Almaty balalar jedel medıtsınalyq járdem ortalyǵyna jetkizdi.
Balanyń jaqyndary onyń sol tunbany ishkenin bilmegendikten, bala taǵamnan ýlanǵan dep boljap, naqty dıagnoz qoıý qıynǵa soqqan. Dastan buryn eshqashan dári-dármek pen taǵam allergııasynan zardap shekpegen.
«Bizge bala III dárejeli ekzoýytty shok saldarynan óte aýyr jaǵdaıda tústi, balada qandaǵy glıýkozanyń joǵarylaýy (18 mmol/l deıin), gıperglıkemııa, ketoatsıdoz, bas mı isinýi, jalpy ıntoksıkatsııa belgileri baıqaldy. Sanasy komada boldy. Qabyldaý bóliminiń jaǵdaıynda naýqasty kópbeıindi dárigerler brıgadasy tekserip, shuǵyl túrde klınıkalyq jáne zerthanalyq zertteýler júrgizildi.
Taýshymyldyq tunbasymen jedel ýlaný. Aýyr dáreje. 3-dárejeli ekzoýytty shok. Ýytty entsefalopatııa. Ýytty gepatıt. Naýqas jansaqtaý bólimine jatqyzyldy, onda oǵan jeke dárigerlik jáne medbıkelik post taǵaıyndaldy. Jaǵdaıynyń aýyrlyǵyna baılanysty naýqastyń júregi eki ret toqtap qalǵan. RQTB qyzmetkerleri balany reanımatsııalap, jaǵdaıyn turaqtandyrýǵa qol jetkizdi», - deıdi Almaty Balalar jádel medıtsınalyq járdem ortalyǵynyń toksıkologııa bóliminiń meńgerýshisi Hýrmetbek Tohtar.
Dastanyń anasy balasyn aman alyp qalǵan dárigerlerge alǵysyn aıtty.
«10-bólimsheniń medıtsına qyzmetkerlerine, ásirese Hýrmetbek Tohtarulyna, M.G. Maqulbekov, T.M. Bıdaıbaı, A.Z. Rıgı, A. Kýlımbetov, nevropatolog N.N. Qurmanbaevqa ulym úshin alǵys bildiremin. Jankeshti eńbektiń, joǵary kásibıliktiń, qaıyrymdylyqtyń, sapaly medıtsınalyq kómek kórsetýge degen umtylystyń arqasynda ulym aman qaldy. Júregi eki ret toqtap qaldy, bir táýlikten astam ýaqyt komada boldy, jasandy tynys alý apparatyna qosyldy. Mine, endi biz esh patologııasyz derlik úıge shyqqaly jatyrmyz, densaýlyǵymyz jaqsy, barlyq analızder jaqsy nátıje berdi. Kásibı mamandardy tańdap, jumysty jaqsy uıymdastyrǵany Balalar jedel medıtsınalyq járdem ortalyǵynyń búkil ujymyna kóp rahmet», - dep rahmet aıtty Dastannyń anasy.
Óz kezeginde dárigerler azyq-túlik qaýipsizdigi sharalaryn qatań saqtaýdy, dári-dármek pen bala densaýlyǵyna qaýipti zattardy olardyń qoly jetpeıtin jerde saqtaýǵa shaqyrdy.
Jaz – konservi men marınadty daıyndaý maýsymy, bul kezde sirke sýy jáne basqa qaýipti zattarmen ýlaný yqtımaldyǵy aıtarlyqtaı arta túsetiniń eske saldy.
