Almatylyq dárigerler jol apatyna ushyraǵan avtobýs jolaýshylaryna qatysty aqparat berdi
ALMATY. QazAqparat - Almatylyq dárigerler qalada jol apatyna ushyraǵan avtobýsta zardap shekken jolaýshylardyń jaǵdaıyna qatysty aqparat berdi, dep habarlaıdy QazAqparat tilshisi.
Eske sala keteıik, ótken senbi kúni Súıinbaı kóshesimen kele jatqan 416-shy baǵdardaǵy avtobýs apatqa ushyrap, 8 adam jaraqattanǵan bolatyn. Alaıda, Almaty qalasynyń densaýlyq saqtaý basqarmasy 6 jolaýshy ǵana medıtsına kómegine júgingenin aıtty. Zardap shekken jolaýshylardyń bireýi - bala.
«Úsh jolaýshy Almaty kópbeıindi klınıkalyq aýrýhanasyna jetkizildi. Bir jolaýshyǵa oqıǵa ornynda medıtsınalyq kómek kórsetilse, jaraqattanǵan eki jolaýshy qala klınıkalaryna ornalastyryldy. Zardap shekken bala Balalarǵa jedel medıtsınalyq kómek kórsetý ortalyǵyna jetkizildi. Dárigerler ony tekserip, neırohırýrgııa bólimine jatqyzdy. Onyń mıy shaıqalyp, bas súıegi zaqymdanǵan. Ústińgi erni jyrtylǵan. Búgingi kúni jaǵdaıy ortasha dep baǵalanyp otyr», - dedi Almaty Densaýlyq basqarmasy.
Sonymen qatar, oqıǵa ornynan taǵy bir jolaýshy №4-shi qalalyq aýrýhanaǵa aýyr jaǵdaıda jetkizilgen bolatyn. Densaýlyq saqtaý basqarmasynyń baspasóz qyzmeti jolaýshy dárigerlerdiń baqylaýynda ekenin aıtty.
«Ol jolaýshyǵa jabyq bas súıek jaraqaty men mıy shaıqalǵan degen dıagnoz qoıylyp, klınıkaǵa jatqyzyldy. Jolaýshynyń jaǵdaıy ortasha», -dedi vedomstvonyń baspasóz qyzmeti.
Eske sala keteıik, Súıinbaı kóshesimen ońtústik baǵytpen kele jatqan 416-shy baǵdardaǵy avtobýs jol shetindegi aǵashqa soǵylǵan. Avtobýs júrgizýshisi ózge jolaýshynyń qateliginen kólik róline ıe bola almaı, jol jıegindegi aǵashqa soǵylǵanyn jetkizgen. Avtobýsta barlyǵy 20 jolaýshy bolǵan.
