Almatylyq dárigerler jasy 60-tan asqan er adamnyń kózinen metall synyǵyn alyp shyqty
ALMATY. QazAqparat – Almatyda Ortalyq qalalyq klınıkalyq aýrýhanada kózine metall synyǵy túsken 62 jastaǵy er adamǵa kúrdeli operatsııa jasaldy. Bul týraly OQKA oftalmology Gúlzat Ábdiraıymova aıtty, dep habarlaıdy QazAqparat tilshisi.
Dárigerdiń aıtýynsha, kúrdeli operatsııa mindetti áleýmettik medıtsınalyq saqtandyrý esebinen jasaldy.
«62 jastaǵy er azamattyń kózine metall synyǵy túsken. Kóligin jóndeý barysynda oń kózine metall synyǵy túsken ol shuǵyl túrde aýrýhanaǵa jetkizildi. Metall synyǵy kózdiń barlyq qabattarynan ótip, kóz orbıtasynyń ishine, janardyń júıke tamyrlary ornalasqan tusyna qadalǵan. Ota barysynda metall alynyp, jaraqattyń saldarynan bolatyn menıngıt pen sepsıstiń aldyn aldyq», - dedi oftalmologııa bólimshesi meńgerýshisi Gúlzat Ábdiraıymova.
Joǵary tehnologııalar men bilikti mamandar patsıenttiń kóz janaryn saqtap qaldy.
«Kúrdeli ota úsh saǵatta aıaqtaldy. Jalpy, mundaı ota asqan sheberlikti, zergerge tán dáldikti talap etedi. Óıtkeni operatsııa barysynda kózdegi shynyáınektiń pishinine tıtteı de zaqym kelmeýi tıis», - deıdi oftalmolog.
Qazir emdelýshiniń jaǵdaıy jaqsy, kórý qabileti qalpyna keldi. Biraq ol aldaǵy ýaqytta kóz dárigerleriniń baqylaýynda bolýy tıis.
Aıta keteıik, OQKA-nyń oftalmologııa bólimshesi patsıentterdi táýlik boıy úzdiksiz qabyldaıdy. Bólimshe kepildendirilgen tegin medıtsınalyq kómek paketi men MÁMS aıasynda qyzmet kórsetedi. Bıylǵy jyldyń basynan beri oftalmologııa bólimshesinde 450-ge jýyq operatsııa jasaldy.
