Almatylyq dárigerler jańa týǵan sábıden salmaǵy 1 kg bolatyn isikti alyp tastady

ALMATY. QazAqparat - Almaty qalasyndaǵy Pedıatrııa jáne balalar hırýrgııasy ǵylymı ortalyǵynyń mamandary jańa týǵan sábıge kúrdeli operatsııa jasady. Dárigerler shaqalaqtyń denesine týabitken 1 keliden astam isikti alyp tastady, dep habarlaıdy QazAqparat Densaýlyq saqtaý mınıstrliginiń baspasóz qyzmetine silteme jasap.

Іsiktiń kólemi óte úlken, salmaǵy - 1028 gr. Segizkóz-quıymshaqqa týabitken isikti dárigerler bala anasynyń qursaǵynda jatqanda 19-shy aptada anyqtaǵan. Іsik teridegi erozııalyq ýchaskelerdiń paıda bolýyna áser etip, tik ishekti qysyp, qatty qansyraý qaterin týǵyzǵan.

«Josparly operatsııa jasaý úshin sábı perzenthanadan birden Pedıatrııa jáne balalar hırýrgııasy ǵylymı ortalyǵyna jetkizildi. Hırýrgııalyq operatsııa bala dúnıege kelgen soń úsh táýlikten keıin jasaldy. Óıtkeni salmaǵy 3818 gramm bolyp týǵan shaqalaqty aldyn ala emge daıyndaý kerek boldy. Іsikti alyp tastaý otasy 3 saǵatqa sozyldy jáne esh asqynýsyz ótti» dep habarlady DSM baspasóz qyzmeti.

Mamandardyń aıtýynsha jańa týǵan balalardaǵy isikterdi operatıvti alyp tastaý tolyq jazylýǵa kepildik beredi. Jańa týǵan náreste 3-shi táýlikte jansaqtaý bóliminen neonotologııa bólimine anasynyń qasyna aýystyrylyp, erekshe kútim alyp jatyr.

Ǵylymı ortalyq mamandarynyń aıtýynsha, búginde balanyń jaǵdaıy turaqty.