Almatylyq dárigerler jańa týǵan náresteniń ómiri úshin bir aı boıy kúresti
Ortalyqtyń balalar reanımatsııasynyń meńgerýshisi Dılıara Syrtanovanyń aıtýynsha, týa bitken toksoplazmozdyń bolý sebebi júktilik kezinde anasynyń ınfektsııasy bolǵan.
«Bala 2912 gramm salmaqpen tolyq merzimde dúnıege keldi, biraq ishki aǵzalardyń durys jumys istemeýine ákelgen qursaqishilik ınfektsııa saldarynan ómirge kelgen sátinde jaǵdaıy óte aýyr dep baǵalandy. Bala birden reanımatsııa bólimine aýystyryldy. Infektsııa baladan óte aýyr ótti, mıǵa jappaı qan ketý, kóptegen organdardyń jetkiliksizdigi oryn aldy, sonymen qatar, aýyr pnevmonııa dıagnozy qoıyldy. Munda ol týra bir aı jatty, jaǵdaıy turaqtanǵan soń bólimshege aýystyryldy», - dedi dáriger.
Jansaqtaý bóliminde náreste tynys alý, ınfýzııalyq, kardıotonıkalyq, antıbakterıaldyq terapııa aldy, qan preparattarynyń birneshe transfýzııasynan ótti. Reanımatsııadan keıin bala bólimshede taǵy 10 kún medıtsınalyq kómek aldy. Búgingi tańda balanyń jaǵdaıy qanaǵattanarlyq jáne ol keshe úıge shyǵaryldy.
Dáriger júkti áıelderde toksoplazmoz ınfektsııasy negizinen quramynda kıstasy bar termııalyq óńdelmegen etti jeý nemese las tamaq ne sý, mysyqtyń nájisimen taralatyn ootsıstalardy jutý nátıjesinde paıda bolatynyn aıtty.
«Áıelderde júktiliktiń kesh kezeńinde uryqty juqtyrý yqtımaldyǵy joǵary. Degenmen, júktiliktiń erte kezeńinde de embrıon aýyr aýrýǵa beıim. Jalpy, júktilik kezinde ınfektsııany juqtyrǵan áıelderdiń 30-40%-da uryqqa qursaqishilik jolmen ınfektsııa juqtyrylady», - dedi Dılıara Syrtanova.
