Almatylyq dárigerler jańa ádispen naýqastyń julynyndaǵy qaterli isikti alyp tastady
ALMATY. QazAqparat- Ortalyq qalalyq klınıkalyq aýrýhana dárigerleri ıntraoperatsııalyq neıromonıtorıng júıesiniń kómegimen tuńǵysh ret erekshe ota jasap, julyndaǵy qaterli isikti alyp tastady. Joǵary tehnologııaly operatsııa mindetti áleýmettik medıtsınalyq saqtandyrý esebinen jasaldy, dep habarlaıdy QazAqparat tilshisi.
Aýrýhananyń neırohırýrgııa bólimi meńgerýshisi Marat Almatovtyń aıtýynsha, atalǵan ádis operatsııa kezinde patsıenttiń júıke júıesin zaqymdanýdan barynsha qorǵaıdy. Sonymen qatar, neırohırýrgtiń ota barysynda jasalatyn manıpýlıatsııalardy bastan-aıaq baqylap otyrýyna múmkindik beredi.
«Operatsııa aldynda biz naýqastyń bulshyq etterine jáne organızmniń fýnktsıonaldyq mańyzy bar aýmaǵyna arnaıy elektrodtar ornatamyz. Keıin olardy ıntraoperatsııalyq neıromonıtorıng júıesine qosamyz. Sol arqyly operatsııa barysyn tolyq baqylaýda ustaımyz. Bul júıe manıpýlıatsııa barysynda júıke júıesiniń zaqymdanýyna jol bermeıdi», - deıdi dáriger.
Joǵary tehnologııaly operatsııa naýqastyń 6 jáne 7-shi omyrtqa bóligine jasaldy.
«Eki saǵatqa sozylǵan ota sátti ótti. Patsıenttiń qalypty ómirge qaıtyp oralýǵa tolyq múmkindigi bar. Aıta keteıin, ulyndaǵy isik saldarynan júıke qyzmeti buzylady. Ádette, aıaq-qolda álsizdik paıda bolady, sezimtaldyǵy joıylady, jambas pen jynystyq organdardyń fýnktsııasy buzylady»,- dedi Marat Almatov.
Joǵary tehnologııalardyń kómegimen jasalatyn operatsııalardyń aqysy mindetti áleýmettik medıtsınalyq saqtandyrý qarajaty esebinen tólenedi.
