Almatylyq dárigerler jambas súıegi synǵan 90 jastaǵy ájeni aıaǵynan tik turǵyzdy
Aýrýhananyń baspasóz qyzmetiniń málimetinshe, Tamara Grıgorevna Almaty qalalyq jedel shuǵyl kómek kórsetý aýrýhanasynyń qabyldaý bólimine jedel járdem brıgadasymen shuǵyl túrde jetkizildi. Naýqas oń jambas býyny aımaǵyndaǵy qatty aýyrsynýǵa jáne oń aıaqtyń tirek qabiletiniń buzylýyna shaǵymdanǵan.
Dárigerler qart ájeıge súıek synyqtarynyń yǵysýy men oń jaq jambas súıeginiń jabyq túrdegi synýy dıagnozyn qoıdy. Naýqastyń jasy men jaǵdaıyn eskere otyryp, qosymsha tekserý jáne aldyn ala daıyndyqtan keıin múmkindiginshe tez áreket etý qajet boldy. Sondyqtan naýqas dereý hırýrgııalyq emdeýge jiberildi. Oń jambas býynyn bıopolıarlyq endoprotezdeý dep atalatyn operatsııany №2 travmatologııa jáne ortopedııa bólimshesiniń meńgerýshisi Medet Janysov, travmatologtar Jánibek Jumabek, Begzod Hanseıitov, anestezıolog Gúlnar Kamalova jasady. Operatsııa 30 mınýtqa sozyldy.
«Mundaı jaǵdaıda naýqas múmkindiginshe az jatqany mańyzdy. Egde jasta, ókinishke qaraı, kóptegen sozylmaly aýrý jınalyp qalady. Onyń ústine jazylýy baıaý ınfektsııalar qosylady. Sondyqtan mundaı naýqastar úshin endoprotezdeý óte mańyzdy», - dep atap ótti bólimshe meńgerýshisi Medet Janysov.
Onyń aıtýynsha, egde jastaǵy patsıentter úshin tolyq protezdeý qaýipti. Al osteosıntezdiń paıdasy joq. Al jambasty bıpolıarly endoprotezdeý negizinen álsiregen jáne egde jastaǵy naýqastarǵa arnalǵan. Bıpolıarly endoprotezdeý patsıentti tolyqqandy, belsendi ómirge múmkindiginshe qysqa merzimde jáne meılinshe az táýekelmen qaıtarý úshin qoldanylady.
«Naýqas 3 kúnnen keıin ornynan turyp, palatada júre bastady. Aýrýhanadan 9-shy kúni shyǵarylǵan kezde ol bólim dálizimen júris arbasymen óz betinshe qozǵaldy. Eń bastysy, ol dárigerlerdiń usynystaryn buljytpaı jaýapkershilikpen oryndaıdy, bul óte mańyzdy», - deıdi dárigerler.
