Almatylyq dárigerler Prezıdent ókilettigin uzartý jónindegi referendým ótkizýdi qoldady
ALMATY. 11 qańtar. QazAqparat /Erbol Turymbetov/ - Búgin Almaty qalalyq №12 ortalyq klınıkalyq aýrýhanasynda Almaty qalasy dárigerler qoǵamynyń QR Prezıdenti N. Nazarbaevtyń ókilettigin 2020 jyldyń 6 jeltoqsanyna deıin uzartý jónindegi referendým ótkizý máselesin talqylaýǵa arnalǵan konferentsııa bolyp ótti.
Konferentsııa barysynda Almaty qalalyq barlyq medıtsına mekemelerinen jınalǵan ókilder Tuńǵysh Prezıdenttiń ókilettigin uzartý jónindegi referendým ótkizýdi usynǵan bastamashy toptyń usynysyn ortaǵa saldy. Almatylyq yntaly top basshysy, QR Ulttyq ǵylym akademııasynyń prezıdenti Murat Jurynov Elbasynyń ókilettigin referendým ótkizý arqyly uzartý búgingi kúngi eń tıimdi jol jáne Prezıdenttiń oǵan laıyq ekenin atap ótti. «Ózderińizge belgili, Elbasymyz referendýmǵa óz qarsylyǵyn bildirdi. Alaıda, Parlamenttiń 4/5 bóligi, ıaǵnı, 80 paıyzy qoldasa, onda Parlament referendým ótkizý týraly sheshim shyǵara alady. N. Ábishulynyń elimizdiń táýelsizdigi men búgingi deńgeıge jetýine sińirgen eńbegin eskere kelgende, onyń ókilettigin uzartý óte oryndy dep esepteımin», - dedi ǵalym.
M. Jurynovtyń sózin QR eńbek sińirgen qaıratkeri, densaýlyq saqtaý salasynyń ardageri, Almaty qalalyq yntaly top múshesi Nına Kaıýpova da qostady. Óz sózinde N. Kaıýpova Elbasynyń eldiń áleýmettik-ekonomıkalyq damýymen birge, densaýlyq salasyna da basa nazar aýdaryp otyrǵanyna toqtaldy.
Jıyn sońynda qatysýshy barlyq dárigerler biraýyzdan QR Prezıdentiniń ókilettigin 2020 jyldy sońyna deıin uzartý týraly referendým ótkizýdi qoldaıtyndyqtaryn bildirdi.
