Almatylyq dárigerler ókpesiniń 96 paıyzy zaqymdanǵan zeınetkerdi aman alyp qaldy

Naýqas koronavırýs juqtyryp, aýyr jaǵdaıda ekijaqty pnevmonııamen aýrýhanaǵa túsken. Bul týraly qalalyq ortalyq aýrýhananyń baspasóz qyzmeti málim etti, dep habarlaıdy QazAqparat tilshisi.

Vedomstvo málimetinshe, 67 jastaǵy áıel Almatynyń Ortalyq qalalyq klınıkalyq aýrýhanasyna 22 naýryz kúni aýyr halde túsken. KT tekserý kezinde ókpeniń ekijaqty polısegmenttik zaqymdanýyn kórsetti. Sonymen qatar, ókpeniń 96 paıyzy qabynǵany anyqtaldy.

Naýqas dereý jansaqtaý bólimine jatqyzyldy. Aýrýhana reanımatologtary segiz kún degen de ony aýyr jaǵdaıdan alyp shyqty.

Emdeý kezinde mamandar ottegimen qamtamasyz etilgen medıtsınalyq quraldardy qoldandy. Tek dárigerlerdiń kásibı áreketteriniń arqasynda áıeldiń beti beri qarady.

«Emdeý sharalary sozylmaly ózge de aýrýlar bolǵandyqtan qıyn boldy. Naýqasta arterııalyq gıpertonııa, júrek-qan tamyrlary jetkiliksizdigi, ıshemııalyq kardıomıopatııa bolǵan. Búgin naýqas aýrýhanadan tolyq jazylyp úıine shyqty. Qazir densaýlyqjaǵdaı jaqsy. Endi ambýlatorııalyq jaǵdaıda jergilikti dárigerdiń baqylaýynda bolady, qajet bolǵan jaǵdaıda ol ońaltý kýrsynan ótedi «, - deıdi emdeýshi dáriger Ihtııar Baıjanov.

Almatylyq áıel dárigerlerge alǵys aıtty.

«Bar qıyndyq artta qaldy. Men dárigerlerge, medbıkelerge jáne sanıtar qyzmetkerlerge óte rızamyn. Olar meni aman alyp qaldy. Maǵan ekinshi ómir syılaǵandary úshin úlken raqmet», - dedi ol.