Almatylyq dárigerler ókpesi 96%-ǵa zaqymdanǵan naýqasty aman alyp qaldy

Almaty qalalyq Qoǵamdyq densaýlyq saqtaý basqarmasynyń habarlaýynsha, karantın kezinde jumys istegen medıtsınalyq mekemelerdiń patsıentteri ómirlerin saqtap qalǵan dárigerlerge rızashylyqtaryn bildirýde. Epıdemıologııalyq ahýal órship turǵan ýaqytta Almaty qalasy Jedel shuǵyl kómek kórsetý aýrýhanasynyń dárigerleri aýyr jaǵdaıda ondaǵan kúrdeli ota jasady. Sonymen qatar, ókpesi aqymdanǵan naýqastardy da aman alyp qaldy.

Ókpesiniń 96%-y zaqymdanǵan professor Nesiphan Bektenov jedel shuǵyl kómek kórsetý aýrýhanasyna aýyr halde tústi.

«Ákem aýyr jaǵdaıda aýrýhanaǵa jetkizilip, jansaqtaý bólimine tústi. Onyń ómirine qaýip tóngen bolatyn. Aýrýhana dárigerleriniń kásibı sheberliginiń arqasynda ákem aman qaldy. Ol bir aıǵa jýyq aýrýhanada jatty, onyń 17 kúnin jansaqtaý bóliminde ótkizdi. Men ákemniń ómirin saqtap qalǵan barlyq dárigerlerge, medbıkelerge shyn júrekten alǵys aıtamyn»,– dedi naýqastyń qyzy.

Jansaqtaý bóliminiń meńgerýshisi Tımýr Raıymjanovtyń aıtýynsha, naýqas áli de dárigerlerdiń baqylaýynda bolady.

«Biz ony barlyq medıtsına qyzmetkerleriniń úılesimdi jumysynyń arqasynda aman alyp qaldyq. Emdeý naýqastyń jaǵdaıyna baılanysty únemi túzetilip otyrdy. Biz naýqastardy táýlik boıy baqylap otyramyz, karantınniń erekshe jaǵdaılaryna qaramastan, dárigerler birin-biri almastyrady, medbıkeler únemi baqylaý júrgizedi, sanıtarlar da kómektesedi, qarqyndy terapııa kezinde massaj jasaý, naýqasty jalǵyz qaldyrmaý óte mańyzdy»,– dedi dáriger.