Almatylyq dárigerler MÁMS aıasynda naýqasqa kúrdeli ota jasady

ALMATY. QazAqparat- Ortalyq qalalyq klınıkalyq aýrýhanaǵa omyrtqasy synǵan 60 jastaǵy er adam tústi, dep habarlaıdy QazAqparat tilshisi.

Aýrýhananyń baspasóz qyzmetiniń málimetinshe, steroıdty osteoporozdan bolǵan synyq saldarynan patsıenttiń súıekteri syrqyrap, bulshyq eti aýyrǵan.

Neırohırýrgııa bólimi meńgerýshisi Marat Almatovtyń aıtýynsha, patologııalyq synyq súıek tinindegi qurylymdyq ózgeristerge baılanysty paıda bolady. Saldarynan súıektiń tózimdiligi tómendep, bolmashy jaraqattyń ózi synyqqa ákep soqtyrýy múmkin. Jan-jaqty tekserilgennen keıin patsıenttiń omyrtqasyna vertebroplastıka jasaldy.

«Vertebroplastıka – omyrtqany «súıekke arnalǵan tsementtiń» kómegimen ishten bekitýge múmkindik beretin operatsııa. Shaǵyn ınvazıvti operatsııa kezinde teriniń az ǵana bóligi kesiledi. Ota barysynda biz omyrtqaǵa ınemen medıtsınalyq tsement saldyq. Protsedýra bastan-aıaq rentgen arqyly baqylandy. Bul kúrdeli ota, sebebi tsementti omyrtqaǵa alty mınýttyń ishinde salyp bitirý qajet», - deıdi neırohırýrg Marat Almatov.

Jergilikti jansyzdandyrý arqyly jasalǵan operatsııa 40 mınýtta aıaqtaldy. Qazir patsıenttiń jaǵdaıy jaqsy. Aldaǵy bir-eki táýlikte ol qalypty ómirge qaıta oralmaq.

«Vertebroplastıka – joǵary tehnologııalardyń kómegimen jasalatyn zamanaýı otanyń bir túri. Onyń quny 300 myńnan 1 mıllıon teńgege deıin jetýi múmkin. Joǵary tehnologııalyq qyzmettiń bul túri saqtandyrylǵan patsıentterge tegin jasalady», - deıdi Medıtsınalyq saqtandyrý qorynyń Almaty qalalyq fılıaly dırektory Tileýhan Ábildaev.