Almatylyq dárigerler MÁMS aıasynda aýrýhanaǵa jatý máselesin túsindirdi
ALMATY. QazAqparat - Álemniń ozyq tájirıbeleriniń biri - mindetti áleýmettik medıtsınalyq saqtandyrý aıasynda qajetti kómek alý máselesi halyqty alańdatyp otyrǵany aqıqat. Jańa júıe boıynsha adam qaı jaǵdaıda statsıonarlyq kómek ala alady? Al shuǵyl túrde aýyryp túsken jaǵdaıda qalaı bolmaq? Osy oraıda, QazAqparat tilshisi №5 qalalyq aýrýhananyń bas dárigeri Sadyqov Bolattan MÁMS aıasynda statsıonarlyq kómekti qalaı alýǵa bolatyndyǵyn anyqtap bildi.
«Shynymen de bul másele halyqty alańdatyp otyr. Eń birinshi kezekte aıtarym, saqtandyrý qarjysy tólengen jaǵdaıda adamdar alǵashqy medıko-sanıtarlyq kómek berýshilerdiń nusqaýymen aýrýhanaǵa jata alady. Nemese medıtsınalyq uıymnyń josparly statsıonarlyq kómegi aıasynda jatqyzylady. Bul áleýmettik mańyzy bar aýrýlarǵa qatysty emes. Al, shuǵyl túsken jaǵdaıda oǵan nusqaý keregi joq. Shuǵyl jaǵdaıda aýrýhanaǵa jatqan adamdar Memlekettik tegin medıtsınalyq kómek berý kólemi aıasynda emdeletin bolady. Al saqtandyrý júıesiniń qatysýshysy bolyp tabylmaıtyn adamdar, MÁMS qoryna aqsha tólemeıtin adamdar memlekettik tegin medıtsınalyq kómek berý kólemi aıasynda kómek ala alady», - dedi Bolat Sadyqov.
Mamannyń aıtýynsha, MÁMS aıasynda aýrýhanaǵa jatý úshin belgili bir mekenjaıda tirkelý shart emes.
«Shuǵyl jatqan adamǵa tirkeýi joq bolsa da kómek kórsetiledi. MÁMS aıasynda medıtsınalyq kómek turǵylyqty jerine qaramastan kez-kelgen adamǵa birdeı kórsetiledi. Tek eń bastysy Medıtsınalyq uıymnyń saqtandyrý qorymen kelisimsharty bolý kerek»,- dedi ol.
Adamdarǵa jınaǵan aqsham emdelýge jete me dep alańdaýǵa esh negiz joq deıdi mamandar.
«Halyq jınaǵan aqsham jete me dep alańdaýly. Biraq, mundaı alańdaýshylyqqa esh negiz joq. Sebebi, saqtandyrý júıesi jınaq emes. Qandaı tólem salynsa da saqtandyrý júıesiniń qatysýshysy kez-kelgen medıtsınalyq qyzmetke qoljetkize alady. Shyǵyndardy saqtandyrý júıesi tóleıdi. Saqtandyrý qorymen jasalǵan kelisim boıynsha barlyq materıaldyq jáne eńbek resýrstary medıtsınalyq uıymnyń moınynda bolady. Naýqastarǵa dári satyp alý, tamaqqa tóleýdiń qajettiligi joq. Statsıonarlyq emdeýdiń barlyq shyǵyndaryn qor óz moınyna alady. Eger dári joq bolǵan jaǵdaıda, medıtsınalyq mekeme dáriniń balamasyn tabýy tıis», - dedi ol.
Aıta ketý kerek, elimizde 2017 jyldyń shildesinen bastap MÁMS júıesi engizilgeni belgili.
Búginde QR azamattarynyń saqtandyrý qoryna tólegen tólemderi 14 mlrd teńgege jetti.
2018 jyldyń 1 qańtarynan bastap jarnalardy tóleýge ózin-ózi qamtamasyz etip otyrǵan tulǵalar da kirise bastaıdy.
Al memleket jarna tóleýden áleýmettik turǵydan az qorǵalǵan 14 sanattaǵy tulǵalar úshin tóleıtin bolady.
Jaldamaly jumysshylar 2019 jyldyń 1 qańtarynan bastap qosylatyn bolady.
QR Elbasy Nursultan Nazarbaev «Qazaqstannyń úshinshi jańǵyrýy: jahandyq básekege qabilettilik» joldaýynda bilim berý júıesimen qatar densaýlyq saqtaý júıesi de ózgerýge tıis ekendigin aıtqan bolatyn.
«Bıylǵy 1 shildeden memlekettiń, jumys berýshilerdiń, azamattardyń ortaq jaýapkershiligine negizdelgen mindetti medıtsınalyq saqtandyrý júıesi (MMSJ) engizile bastaıdy. Bul júıeniń tıimdiligi álemdik tájirıbe arqyly dáleldengen.
Medıtsınalyq saqtandyrý júıesine qatysýshylarǵa keń aýqymdaǵy medıtsınalyq qyzmetter usynylady. Oǵan halyqtyń áleýmettik álsiz toptarynyń qatysýyna memlekettik qoldaý kórsetiledi.
Úkimet qajetti deńgeıde densaýlyq saqtaý salasyn aqparattandyrýy kerek. Básekelestikti damytý úshin jeke menshiktegi medıtsına mekemelerine MMSJ júıesi aıasynda teń jaǵdaı týǵyzý kerek.
Úkimetke jáne ákimderge keń aýqymdy aqparattyq-túsindirý jumysyn júrgizýdi tapsyramyn», - degen bolatyn memleket basshysy.
