Almatylyq dárigerler kúıik shalǵan 89 jastaǵy zeınetkerdi aman alyp qaldy
ALMATY. QazAqparat - Almaty dárigerleri zeınetkerdiń ómirin ajaldan arashalap qaldy, dep habarlaıdy QazAqparat tilshisi.
89 jastaǵy almatylyq Anatolıı Sparısh monshadaǵy peshke qulap, qatty kúıip qalǵan. Soǵan qaramastan, ol úıinde emdelýdi jón kórgen. Tek eki aptadan keıin, jaǵdaıy nasharlap ketken soń týystary №4 aýrýhanaǵa alyp kelgen.
«13 shilde kúni 89 jastaǵy zeınetker klınıkaǵa S=8%(6%)/I-II-IIIa-IIIb dárejesindegi arqa jáne oń qolynyń termııalyq kúıigimen tústi. Qabyldaý kezinde, naýqas kúıik shalǵan oń ıyǵynyń aýyrsynýyna, álsizdikke shaǵymdandy. Alǵashqy medıtsınalyq kómek kórsetilgennen keıin, qarııa aýrýhanaǵa jatqyzyldy», - dedi №4 Qalalyq klınıkalyq aýrýhananyń travmatolog dárigeri Eldos Álmenov.
№4 Qalalyq klınıkalyq aýrýhanasynyń kombýstıolog dárigerleri kúıik shalǵan zeınetkerdiń oń qoly men ıyǵyn bir aı emdedi.
«Men ulymnyń saıajaıyndaǵy monshada taıyp qulap, qolym men ıyǵymdy qatty kúıdirip aldym, dárigerler meni aıaǵymnan turǵyzý úshin úlken táýekelge bardy. Bir aı boıy emdeldim, maǵan biregeı operatsııa jasady – terini transplantatsııalaý. Ota meniń jasyma qaramastan sátti ótti. Dárigerlerge óte rızamyn», – dedi zeınetker.
