Almatylyq dárigerler koronavırýstyń balalardyń densaýlyǵyna qalaı áser etetinin aıtyp berdi
Bul týraly qalalyq klınıkalyq balalardyń ınfektsııalyq aýrýhanasynyń bas dárigeri Erjan Seralın aıtty, dep habarlaıdy QazAqparat tilshisi.
Erjan Seralınniń aıtýynsha, balalar koronavırýspen jıi aýyrady, biraq olarda aýrýǵa eresekterdegideı ımmýndyq jaýap joq, ádette aýrýdyń aǵymy kishkentaılarda jeńil ótedi.
«Bul balalarǵa saq bolý qajet emes degendi bildirmeıdi. Óıtkeni balalar álsiregen ımmýnıtetpen dertti juqtyrsa, sondaı-aq olardyń sozylmaly aýrýlary bolsa, koronavırýstyń qaýipti bolady», - dedi bas dáriger.
Onyń ústine, balalar – koronavırýstyń ámbebap tasymaldaýshylary, sondyqtan eresekter jaýapty bolýy kerek, vaktsınalanǵan bolsa da, qoǵamdyq oryndarda betperde men áleýmettik qashyqtyqty saqtaǵan jón.
Dárger ınfektsııaǵa bir jasqa deıingi balalardyń da beıim ekenin aıtty.
«Jas shekteýi joq, kóbinese bul mobıldi jastaǵy balalar. Klınıkalyq kóriniske keletin bolsaq, eger ótken jyly kataraldy belgiler basym bolsa, bıyl kataraldy sındrommen qatar asqazan-ishek joldarynyń buzylý jıiligi, sondaı-aq letargııa, tábet pen temperatýranyń tómendeýi sııaqty jalpy ıntoksıkatsııa belgileri baıqalady. Bizdiń aýrýhanaǵa aýrýy ortasha deńgeıdegi balalar jıi túsedi. Derti asqynǵan balalar da bolady. Árıne, derttiń aýyrlyǵy balanyń bastapqy jaǵdaıyna, anamnezde burynnan bar aýrýlardyń qatar júrýine de baılanysty ekenin atap ótken jón», - dedi ol.
Qalalyq klınıkalyq balalardyń ınfektsııalyq aýrýhanasynyń bas dárigeriniń aıtýynsha, balalar dertti úıdegi eresektermen baılanys kezinde juqtyrady.
«Balalar arasyndaǵy dert juqtyrý eresektermen tikeleı baılanysty. Úlkender arasynda vırýs juqtyrý tómendese, onda balalar arasynda aýrýdyń taraýy azaıady. Al derttiń aldyn alatyn jalǵyz tıimdi jol, jalpyǵa ortaq vaktsına saldyrý. Sonda ǵana biz ózimizdi de, balalarymyzdy da qaýipti dertten qorǵaı alamyz», - dedi Erjan Seralın.
Balalardaǵy koronavırýstyń asqynýy pnevmonııanyń órshýinen bolady, jıi emes, biraq qaýipti postkovıdty qabyný sındromy kóptegen organdar men júıelerdi zaqymdaıdy.
«Bizdiń klınıkada juqpaly aýrýlardyń jetekshi mamandary men reanımatologtar, mamandandyrylǵan nevropatologtar, kardıologtar, pýlmonologtar, endokrınologtar, nefrologtar, hırýrgtar táýlik boıy baılanysta bolatyn mýltıdıstsıplınarly top quryldy. Árbir kúrdeli klınıkalyq jaǵdaı talqylaýǵa shyǵarylady. Qajet bolǵan jaǵdaıda sozylmaly aýrýlarǵa qarsy terapııalyq korrektsııa júrgiziledi. Biz ár balaǵa óte muqııat qaraımyz, barlyq qajet saraptamalar men qosymsha tekserýlerdi úlken jaýapkershilikpen júrgizemiz», - dedi spıker.
Dáriger adamdar kóp jınalatyn jerlerde, qoǵamdyq kólikte, kafeler men saýda ortalyqtarynda ınfektsııa qaýpi áli de joǵary ekenin eske saldy.
Sondyqtan burynǵydaı aldyn alý sharalaryn saqtap, balalarǵa osyny úıretý qajet.
«Jaqynda, koronavırýstan basqa, maýsymdyq JRVI jáne tumaý aýrýlary beleń alatyn bolady. Koronavırýstan aıyrmashylyǵy, bul ınfektsııalar balalarda eresekterge qaraǵanda aýyr bolýy múmkin. Sondyqtan, búginde balalardyń qoǵamdyq oryndarǵa barýyn shekteýge tyrysý kerek jáne qajet bolǵan jaǵdaıda ǵana olarmen birge bolyp, qoǵamdyq kólikte qashyqtyqty saqtaý jáne medıtsınalyq maskany durys taǵý kerek», - dep túıindedi dáriger.