Almatylyq dárigerler kóptegen aýrýlary bar, shala týǵan náresteni aman alyp qaldy
Almaty qalalyq qoǵamdyq densaýlyq saqtaý basqarmasynan habarlaǵandaı, qalalyq Perınatologııa jáne balalar kardıohırýrgııasy ortalyǵynda salmaǵy 998 gramm bolyp shala týǵan 7 aılyq náreste dúnıege kelgen.
Jańa týǵan náresteni tekserý kezinde dárigerler aǵzalarynyń jetilmegendigi, búırek jetkiliksizdiginiń aýyr túri, eki jaqty gıpoplazııa jáne búırek polıktozy dıagnozyn qoıady.
«Bul aýyr dárejedegi týa bitken búırektiń zaqymdanýy. Balanyń merziminen buryn 998 gramm bolyp týyp, aǵzalarynyń jetilmegendiginiń ózi jaǵdaıdy kúrdelendirip turǵan, eki búırektiń zaqymdanýy jaǵdaıdy qıyndata tústi. Onyń aman qalýyna úmit az edi. Biz aǵzalardyń jetilmegendigin jeńe alsaq ta, búırekterde asqynýlar bolatynyn bildik. Solaı boldy da, bala reanımatsııada 52 kún, keıin náresteler patologııasy bólimshesinde 2 aı jatty. Biz Asfendııarov kafedrasynan mamandardy shaqyrdyq, konsılıýmdar ótkizdik», - dedi Ortalyq dırektorynyń orynbasary, dáriger-neonatolog Elena Plýjnıkova.
Onyń aıtýynsha, aýrýdyń aýyrlyǵyna qaramastan, bala jaqsy damydy.
Birtindep júrgizilgen barlyq medıtsınalyq kómekten soń bala salmaq qosa bastady, sondaı-aq, qyz balada retınopatııa anyqtalǵandyqtan, onyń kózine operatsııa jasaldy. Aýrýhanadan shyǵarý kezinde eki kelige deıin salmaq qosty.
«Qyz aýrýhanadan shyqqanda densaýlyǵy ortasha-aýyr dárejede bolatyn. Ony birden nefrolog pen ýrolog esepke aldy. Búgingi tańda bala búırektiń jumysyn qamtamasyz etetin dári-dármekter qabyldaıdy. Keıin bala sál ósken soń, búırek transplantatsııasy týraly sóz qozǵaýǵa bolady. Alty aıǵa deıin ony jasaýǵa bolmaıdy, sebebi, bala salmaq qosyp, myqty bola túsýi kerek. Keıin ata-anasy portalǵa ary qaraı emdelý úshin ótinish bere alady», - dedi Elena Plýjnıkova.