Almatylyq dárigerler kásibı merekege oraı marapatqa ıe boldy
ALMATY. QazAqparat - Medıtsına qyzmetkeriniń kúni qarsańynda Kardıologııa jáne ishki aýrýlar ǴZI birqatar qyzmetkeri vedomstvolyq nagradalarmen marapattaldy, dep habarlaıdy QazAqparat tilshisi.
Kardıologııa jáne ishki aýrýlar ǵylymı-zertteý ınstıtýty basqarma tóraǵasynyń orynbasary Qurmanǵazy Madalıev saltanatty shara barysynda medıtsına qyzmetkerlerine tózimdilik pen janashyrlyq bildirip, adam ómirine arasha bolyp, talaı uıqysyz ótkizgen túnderi úshin alǵys aıtty.
Sonymen qatar, birqatar medıtsına qyzmetkerlerin vedomstvolyq nagradalarmen marapattady.
Densaýlyq saqtaý júıesiniń damýyna qosqan úlesi men eńbegi úshin «Densaýlyq saqtaý isine qosqan úlesi úshin» medalimen: kardıolog dáriger Ǵalymjan Sultanov pen aǵa meıirger Baqtygúl Sarmanshaeva marapattaldy.
«Densaýlyq saqtaý isiniń úzdigi» tósbelgisi rentgenhırýrg dáriger Asylhan Párimbekov berildi.
QR Densaýlyq saqtaý mınıstrliginiń Qurmet gramotasymen anestezıst meıirger Elmıra Quspanova, aǵa felsher zerthanashy Venera Sakıeva, terapııa bólimshesiniń palata meıirgeri Aıbostan Almaqanova jáne kardıohırýrgııa bólimshesiniń meıirgeri Marǵulan Sadyhan marapattaldy.
Kardıolog dáriger Irına Belonosova, palata meıirgerleri Aıgúl Qubenova, Indıra Ermaǵanbetova, sondaı-aq sanıtar Aıman Boranchaeva densaýlyq saqtaý mınıstrliginiń alǵys hatyn aldy.
Kardıologııa jáne ishki aýrýlar ǵylymı-zertteý ıstıtýty basqarma tóraǵasynyń orynbasary Qurmanǵazy Madalıev barlyq áriptesterin merekelerimen quttyqtap, olardyń jumysyna toqtaldy.
«Instıtýttyń kardıohırýrgtar komandasy, onyń ishinde Ǵalymjan Berikuly Sultanov júrekke eń kúrdeli operatsııalar jasaıdy. Mysaly, 2020 jyldan bastap kardıohırýrgııa bólimshesinde júrek qaqpaqshasynyń kemistigi nemese júrektiń ıshemııalyq aýrýy bar júrek yrǵaǵynyń buzylysyn emdeý úshin bir sátte ashyq júrekke krıoablıatsııa jasalady. Osy tehnologııa boıynsha ortalyq Qazaqstanda biregeı bolyp esepteledi», - deıdi ol.
Onyń aıtýynsha, meıirgerlerdiń jumysy árqashan suranysqa ıe, ol kez kelgen medıtsına uıymynda óte qajet maman. Meıirgerdiń mamandyǵy adaldyq pen shydamdylyqty talap etedi.
«Medıtsına qyzmetkeriniń kúninde dárigerler men meıirgerlerdiń kómekshisi sanıtarlardyń eńbegi de atalyp ótiledi. Kez kelgen medıtsına uıymy sanıtardyń eńbeginsiz durys jumys jasaı almaıdy, óıtkeni sanıtardyń eńbegi medıtsına personalynyń durys jumys isteýine kómek berýge baǵyttalǵan»,- deıdi Qurmanǵazy Madalıev.
