Almatylyq dárigerler ınsýlttyń aldyn alý tásilderin úırendi
ASTANA. QazAqparat - Almatylyq dárigerler ınsýlt dıagnostıkasynyń jańa ádis-tásilderimen tanysty, dep xabarlaıdy QazAqparat tilshisi.
Nevrologııa men júrek-qan tamyr aýrýlaryna arnalǵan ǵylymı konferentsııa aıasynda tanymal reseılik nevrolog, professor Aleksandr Skoromets óz tájirıbesimen bólisti.
"Insýlt - bul aýyr dertterdiń biri. Insýltqa tap bolǵan adamdaryń 35 protsenti eki táýlikten keıin qaıtys bolyp jatady. Al aman qalǵandardyń dene músheleri sal bolyp, este saqtaý men sóıleý qabiletteri buzylady. Sol sebepti ınsýlt bolǵan jaǵdaıda medıtsınalyq kómekti durys kórsetý kerek", - dep atap kórsetti A.Skoromets.
Reseılik dáriger Qazaqstandaǵy nevrologııalyq qyzmetke joǵary baǵa berdi.
Almaty qalalyq №7 aýrýxanasynyń bas dárigeri Marat Abdýllaevtyń aıtýynsha, búginde ınsýltpen aýyratyn adamdardyń sany kóbeıip keledi. Oǵan birneshe sebep bar.
"Birinshiden, xalyqtyń ómir súrý uzaqtyǵy artyp otyr. Ekinshiden, qant dıabeti, arterıaldy gıpertonııa sııaqty sozylmaly aýrýy bar adamdar az emes. Al ondaı aýrýlardyń arty ınsýltqa ákelip soqtyrady. Negizi, Aleksandr Skorometstiń oqýlyqtary boıynsha kóptegen dárigerler bilim alyp, kásibı sheberlikterin shyńdap otyrady. Sondyqtan onyń dáristeri arqyly biz óz daıyndyǵymyzdy kúsheıte alamyz", - dedi M.Abdýllaev.
Aıta keteıik, Qazaqstanda jyl saıyn myń adamǵa shyqqanda 2,5-3,5 ınsýlt oqıǵasy bolyp jatady. Myń adamnyń ishinde 1,8 oqıǵa adam ólimimen aıaqtalady.
