Almatylyq dárigerler bir kelige jýyq salmaqpen ómirge kelgen sábıdi aman alyp qaldy
Almaty qalalyq qoǵamdyq densaýlyq saqtaý basqarmasy náreste júktiliktiń 29-aptasynda óte aýyr jaǵdaıda dúnıege kelgenin habarlady.
Anasyna Almaty qalasynyń №2 qalalyq perınataldyq ortalyǵynda kesar tiligi jasaldy.
Salmaǵy 980 gramm náreste dúnıege kelip, birden jan saqtaý bólimine aýystyryldy.
«Bala 23 kún boıy ózdiginen dem ala almady, sebebi , ókpesi jetilmegen, sonymen qatar, oǵan pnevmonııa, jedel respıratorlyq dıstress-sındromy, ókpe atelektazy, 2-dárejeli qarynshaishilik qan ketý (mı qarynshalaryna qan ketý), nekrotıkalyq enterokolıt (ishek shyryshty qabyǵynyń nekrozy), tserebraldy depressııa sındromy (tómendeý), qozǵalys belsendiligi, dıffýzdy bulshyqet gıpotenzııasy, shartsyz refleksterdiń tejelýi, óte qysqa oıaný kezeńderi, mı ıshemııasy, DVS-sındromy dıagnozy qoıylǵan», - dep habarlady vedomstvo.
Bólim meńgerýshisiniń mindetin atqarýshy Juldyz Ahmetqalıeva jańa týǵan nárestede qan uıý júıesinde trombozdyń buzylýymen sıpattalatyn jáne trombozben de, qan ketýmen de júretin kúrdeli patologııalyq protsess bolǵanyn aıtty.
«23 kún boıy náreste mehanıkalyq jeldetýde jatty. Jaǵdaıdy turaqtandyrǵan soń biz ony apparattan alyp, taǵy úsh kún jan saqtaý bóliminde baqyladyq. Sodan keıin ol reanımatsııa bólmesine aýystyryldy. Onda 7 kún boldy jáne anasymen birge bolý úshin palataǵa aýystyryldy. Qazir balanyń salmaǵy 2300 gramm», - dedi Juldyz Ahmetqalıeva.
Sondaı-aq, reanımatsııada dárigerler kórý, estý qabiletin saqtaý úshin kúresip, birtindep ózdigimen tamaqtanýǵa jáne asqazan-ishek joldarynyń qalypty jumysyna keltirdi.
Óz kezeginde balanyń anasy aq halatty abzal jandarǵa janqııarlyq eńbegi úshin alǵys aıtty.
«Barlyǵy úshin, baǵa jetpes qoldaýy úshin dárigerlerge kóp rahmet. Sol kezde men ne isterimdi, balama qalaı kómektesetinimdi bilmedim. Dárigerler men medbıkelerdiń arqasynda ǵana meniń balam qazir qasymda. Mine, biz úıge shyǵýǵa daıyndalyp jatyrmyz», - dedi náresteniń anasy.
