Almatylyq dárigerler bir aıda 30 keli salmaq joǵaltqan naýqasty aman alyp qaldy
ALMATY. QazAqparat - Almaty dárigerleri kóptegen ishek fıstýlasymen aýrýhanaǵa túsken naýqasty aman alyp qaldy, dep habarlaıdy QazAqparat tilshisi.
Almaty qalalyq qoǵamdyq densaýlyq saqtaý basqarmasynyń málimetinshe, 45 jastaǵy naýqas ıleostomııa – otadan keıingi qursaq qýysyndaǵy sańylaý, ishtiń orta bólimindegi ishek fıstýlalaryna jasalǵan otadan keıingi tyrtyqtyń saldarynan bolǵan ashyq jaramen Almaty qalalyq jedel shuǵyl kómek kórsetý aýrýhanasynyń (QJShKKA) hırýrgııalyq bólimshesine shuǵyl túrde tústi.
Patsıent jara saldarynan táýligine 5 lıtrge deıin suıyq joǵaltqan, bir aıda 30 keli salmaq tastaǵan, aýrýhanaǵa álsiz kúıde tústi. Buǵan deıin, patsıentke Almaty jáne Almaty oblysynyń aýrýhanalarynda 7 ret ota jasalǵan.
QJShKKA tájirıbeli dárigerleri men medbıkelerinen quralǵan brıgada laparotomııa, adgezıolız, ilmekaralyq abstsesti ashý, ıleo-astsendo-anastomozymen ıleostomııany joıýdy iske asyryp, qursaq qýysyna sanatsııa jáne drenajdaý jasady.
«Bólimshege túskende naýqastyń jaǵdaıy óte aýyr boldy: ishken sýy suıyq retinde birden jaradan qaıta shyǵyp, oǵan aýyrtpalyq túsirip, ábden qajytqan. Birinshi ota 7 saǵatqa sozylǵandyqtan, bizge de qıyn boldy. Biz mundaı otalardy jıi bolmasa da, buǵan deıin de jasaǵanbyz. Hırýrgııada bul eń qıyn otalardyń biri bolyp sanalady. Onyń ústine naýqas óte álsiz boldy», - deıdi dáriger Nurhat Esenbekov.
Naýqastyń jaǵdaıy ońalǵan soń, oǵan ekinshi ota jasaldy.
Qazir patsıenttiń jaǵdaıy jaqsy, ol úıine shyǵaryldy.
