Almatylyq dárigerler bala kúninen baldaqpen júrgen er adamdy aıaqqa turǵyzdy

ALMATY. QazAqparat – Almatylyq dárgerler Qyzylordadan kelgen 34 jastaǵy er adamnyń aıaǵyna kúrdeli operatsııa jasady. Biregeı ota mindetti áleýmettik medıtsınalyq saqtandyrý paketi sheńberinde jasaldy, dep habarlaıdy QazAqparat tilshisi.

Ortalyq klınıkalyq aýrýhananyń baspasóz qyzmetiniń málimetinshe, operatsııa nátıjesinde patsıenttiń sol aıaǵy 5 santımetrge uzartylyp, aıaqtary teńesti.

Dárigerler patsıentke «Jambas súıeginiń týabitti kemistigi. 3-tıptegi CROWE» dıagnozyn qoıǵan.

Ortoped mamannyń aıtýynsha, jigittiń oń aıaǵy sol aıaǵynan 6 sm uzyn bolǵan.

Sondyqtan ol bala kúninen baldaqqa súıenip júrgen.

«Biz endoprotezdiń kómegimen sol jaq jambas súıegin tolyq aýystyryp, sol jaq jambasty anatomııalyq jaǵynan uzarttyq», - deıdi klınıkanyń ortopedııa bólimi meńgerýshisi Qanat Táýekelov.

Dárigerdiń sózine súıensek, jambas býynyn endoprotezdeý kezinde jambastyń basy, moıny men urshyq tolyǵymen jasandy protezge aýystyrylady.

«Mundaı jaǵdaıda jambas súıeginiń osteotomııasy dep atalatyn tásil jaqsy nátıje beredi. Ol aıaqtaǵy aqaýdy túzetip qana qoımaı, aıaqtyń qyzmetin de aıtarlyqtaı qalpyna keltirýge kómektesedi. Operatsııa 2,5 saǵatqa sozyldy», - dedi dáriger.

Aıta keteıik, operatsııa áleýmettik medıtsınalyq saqtandyrý paketi sheńberinde jasaldy.

«MÁMS paketi arqyly osyndaı kúrdeli operatsııalardy jasatýǵa bolady. Saqtandyrylǵan turǵyndar baǵasy qymbat bolyp keletin, joǵary tehnologııalardyń kómegimen jasalatyn qyzmet túrlerin qajetinshe paıdalana alady», - deıdi MSQ Almaty fılıaly dırektory Tileýhan Ábildaev.