Almatylyq dárigerler aıaq tamyrlaryn emdeýdiń jańa ádisin engizýde

ALMATY. QazAqparat- Interventsııalyq hırýrgtarǵa arnalǵan arnaıy sheberlik synyby aıasynda №4 qalalyq klınıkalyq aýrýhana dárigerleri úndistandyq doktor Gırısh Mýkýdpen birge aıaq-qol arterııalaryna birneshe ota jasady, dep habarlaıdy QazAqparat tilshisi.

Interventsııalyq nemese endovaskýlıarlyq hırýrgııa - rentgenendovaskýlıarlyq ádisti qoldanatyn«skalpsiz» aralasýdyń zamanaýı túri.

«Búgin biz úsh ota jasadyq, onyń ekeýi - aıaq arterııalarynyń angıoplastıkasy. Eki naýqasta da aıaqtyń krıtıkalyq ıshemııasy oryn aldy. Olardyń biriniń anamnezinde qant dıabeti boldy, aıaǵynyń birinshi bashpaıy kesilip, jarasy jazylmaǵan. Ballondyq angıoplastıka nátıjesinde qan aǵymy qalpyna keltirildi. Bolashaqta osy klınıka perıferııalyq arterııalardy emdeý ortalyǵyna aınalady dep úmittenemin, óıtkeni bizde mundaı kómekke muqtaj qant dıabetimen aýyratyndar kóp», - dedi professor Gırısh Mýkýd.

Dárigerler 55 jastaǵy dıabettik taban dıagnozy qoıylǵan naýqastyń qan aǵymyn da qalpyna keltirdi.

«Lımfangoıt dıagnozy bar naýqas ta boldy. Ota kezinde oǵan aıaq arterııalarynyń angıografııasy jasaldy, aldyńǵy jilinshik jáne qalqan arterııalarynyń tandemdik stenozy anyqtaldy. Dári-dármekpen qaptalǵan ballondy qoldaný arqyly oń aıaq arterııalaryna ballondy angıoplastıka jasaldy, qan aınalymy qalpyna keltirildi», - deıdi rentgen-endovaskýlıarlyq hırýrgııa jáne kardıologııa bólimshesiniń meńgerýshisi Asqar Narınbaev.

Osylaısha, dárigerler onyń aıaq báshbaıyn aman alyp qaldy.

№4 qalalyq klınıkalyq aýrýhanasynda bir jyl buryn rentgen-endovaskýlıarlyq hırýrgııa bólimshesi ashylyp, búgingi kúnge deıin mı, júrek tamyrlaryna 739 ınterventsııalyq ota, sonymen qatar jatyr arterııalarynyń embolızatsııasy jasaldy.