Almatylyq dárigerler adam omyrtqasyna biregeı ota jasady
ALMATY. QazAqparat – Almatyda Ortalyq qalalyq klınıkalyq aýrýhananyń dárigerleri 37 jastaǵy emdelýshiniń omyrtqasyndaǵy jaryqty alyp tastady. Joǵary tehnologııalyq ota mindetti áleýmettik medıtsınalyq saqtandyrý sheńberinde jasaldy, dep habarlaıdy QazAqparat tilshisi baspasóz qyzmetine silteme jasap.
Neırohırýrgııa bóliminiń meńgerýshisi Marat Almatovtyń aıtýynsha, naýqastyń bel omyrtqadaǵy osteohandroz ben jaryqtyń zardabyn tartqanyna birneshe jyldyń júzi bolǵan. Sondaı-aq bulshyq etteri semip, sol aıaǵyn basa almaı qalǵan.
Dárigerler aqyldasa kele emniń meılinshe jeńil ári eń tıimdi ádisi - shaǵyn ınvazıvti tásilin tańdaǵan. Bul ádis keýde-bel omyrtqa tusynda qysylyp turǵan julyn qurylymyn tolyq qalpyna keltirýge múmkindik beredi.
«Operatsııa jumsaq tinderdi kespeı, týbýstyq keńeıtkish arqyly jasaldy. Mundaı hırýrgııalyq operatsııa bizdiń statsıonarda tuńǵysh ret boldy. Vıntter teri arqyly engizildi. Operatsııa barysynda omyrtqa arasyna jasandy dısk ornatyldy. Úsh saǵatqa sozylǵan ota sátti aıaqtaldy», - dedi Marat Almatov.
Jańa tehnologııalardyń kómegimen jasalatyn zamanaýı emdeý ádisi arqyly operatsııa ýaqytyn qysqartyp, jaqsy nátıjege qol jetkizýge bolady.
Sonymen qatar, emdelýshi otadan keıin kóp uzamaı aıaqqa turyp ketýi tıis.
Qazirgi ýaqytta emdelýshi aýrýhanadan shyǵýǵa daıyndyq ústinde.
«Keıingi kezde óz aıaǵymmen júrýden kúder úze bastaǵan edim. Múgedek arbaǵa tańyldym. Qazir ózim júrip-turamyn. Aıyǵyp kele jatyrmyn, aýyrsyný seziminen aryldym. Neırohırýrgııa bólimshesiniń dárigerleri men medbıkelerine alǵystan basqa aıtarym joq», - dedi emdelýshi.
