Almatylyq dárigerler 80 jastaǵy keıýananyń mıyna óte kúrdeli operatsııa jasady
Aýrýhana baspasóz qyzmetiniń málimetinshe, naýqasty mamyrdyń 15-i kúni №4 qalalyq klınıkalyq aýrýhananyń qabyldaý bólimshesine jedel járdem brıgadasy alyp keldi. Naýqas sóıleý qabiletiniń buzylýyna, bet asımmetrııasyna, sol jaq aıaq-qoldarynyń álsizdigi men uıýyna, jalpy álsizdikke shaǵymdandy.
Keıýanaǵa mı arterııalarynyń trombozynan týyndaǵan tserebraldy ınfarkt dıagnozy qoıylyp, shuǵyl túrde jansaqtaý bólimine jatqyzyldy.
«Emdeý ádisin tańdaǵan kezde naýqastyń jasyn eskerdik. Klınıkalyq dıagnostıkalyq jáne zerthanalyq zertteýler júrgizildi, onyń ishinde bas mıǵa KT, qan tamyrlaryn ýltradybystyq zertteý, rentgen, EKG jasaldy. Terapevt, kardıolog, neırohırýrg, anestezıolog-reanımatolog mamandar naýqasty qarap shyqty. Ota jasaý sheshimi qabyldandy: bas jáne moıyn tamyrlarynyń obstrýktsııasyn endovaskýlıarlyq joıý – selektıvti tserebraldy angıografııa jasaldy. Oń jaq ortańǵy mı arterııasynyń M1 segmentindegi trombtardy bir mezgilde tromboaspıratsııalaýmen (saqtaý tehnıkasy) rentgendik endovaskýlıarlyq mehanıkalyq tromboekstraktsııa jasaldy», - deıdi №4 qalalyq klınıkalyq aýrýhananyń neırohırýrgııa bólimshesiniń meńgerýshisi Nurjan Ájibekov.
Dárigerdiń sózinshe, naýqastyń mı tamyrlaryna jasalǵan operatsııa 50 mınýtqa sozyldy.
«Otadan keıin jaǵdaıy turaqtalǵansha naýqas jansaqtaý bóliminde kezekshi medıtsına qyzmetkerleriniń qatań baqylaýynda boldy. Jaǵdaıy turaqtalǵannan keıin odan ári emdelý úshin neırohırýrgııa bólimine aýystyryldy», - dep qorytyndylady emdeýshi dáriger Aldoǵar Baqtııaruly.
Búgingi kúni aýrýhanada 8 kún em alǵan Zada Báıimbetova saýyǵyp úıge shyǵýǵa daıyndalyp jatyr.
«Qyzyma qonaqqa Qyzylordadan keldim. Kenet jaǵdaıym nasharlap, qol-aıaǵym ustamaı, shuǵyl túrde osy aýrýhanaǵa tústim. Jaqsy dárigerlerdi kezdestirgenim úshin Jaratqanǵa alǵysym sheksiz. Otadan keıin qol-aıaǵym qaıtadan durys isteıdi, óz betimmen júre alamyn, qolymdy kótere alamyn. Aýrýhana ujymyna myń alǵys», – deıdi Zada Báıimbetova.