Almatylyq dárigerler 69 jastaǵy áıelge joǵary tehnologııalyq ota jasady
Vedomstvonyń málimetinshe Almaty onkologııalyq ortalyǵyna uıqy bezi basynyń isigine shaldyqqan 69 jastaǵy áıel túsken. Oǵan Onkohırýrgııa bólimshesiniń meńgerýshisi Nurlan Baltaev alǵash ret laparoskopııalyq gastropankreatodýdenaldy rezektsııa – Ýıppl otasyn jasady.
«Kespeı jasalatyn ota kezinde hırýrg bir mezgilde uıqy beziniń basyn, asqazannyń dıstaldy bóligin, on eki eli ishekti, ash ishektiń bastapqy bóligin, ót joldarynyń bóligin, ót qabyn jáne aımaqtyq lımfa túıinderin alyp tastady. Buryn mundaı dıagnoz qoıylǵan kezde ota dástúrli ádispen - hırýrgııalyq kesý arqyly jasalatyn. Bul óz kezeginde emdelýshige zaqym keltiretin, sebebi, otadan keıingi kezeńde tereń jaralardyń, basqa da kúrdeli asqynýlardyń damý yqtımaldyǵy joǵary bolatyn. Bul joly almatylyq onkologtar otany shaǵyn ınvazıvti ádis – laparoskopııa arqyly birneshe jerden tesip jasady. Mundaı otalar az zaqymdy aralasý bolyp tabylatynyn aıtý kerek», - dep habarlady qoǵamdyq densaýlyq saqtaý basqarmasynyń baspasóz qyzmeti.
Onkohırýrgııa bólimshesiniń meńgerýshisi Nurlan Baltaevtyń aıtýynsha, ondaǵan jyldar boıy gastropankreatodýodenaldy rezektsııanyń nátıjeleri nashar bolǵan.
«Olardy kóptegen asqynýlar, ólim-jitimniń aıtarlyqtaı joǵary deńgeıimen sıpattaýǵa bolatyn. Qazirgi tańda atalǵan otanyń dáleldengen tehnıkasy, otalyq bólmeniń zamanaýı jabdyqtalýy jáne anestezıologtar men reanımatologtardyń joǵary kásibı daıyndyǵy arqasynda aralasýdyń bul túri eń az asqyný jáne otadan keıingi ólim-jitimmen sıpattalyp, uzaq ýaqyt boıy jaqsy nátıje beredi. Ota 7 saǵattan astam ýaqytqa sozyldy. Qan joǵaltý 200 ml-di qurady. Naýqas otadan keıingi birinshi kúni-aq ózin jaqsy sezindi», – dedi Nurlan Baltaev.
Aıta keteıik, sońǵy bes jyl ishinde Almaty onkologııalyq ortalyǵynda dástúrli kesý ádisi arqyly 92 gastropankretodýodenaldy rezektsııa jasalǵan. Endi qalalyq onkologııalyq ortalyqta mundaı otalar shaǵyn ınvazıvti ádispen jasalatyn bolady.