Almatylyq dárigerler 68 jastaǵy naýqastyń aıaǵyn kesýden saqtap qaldy
ALMATY. QazAqparat - 68 jastaǵy naýqas Ortalyq qalalyq klınıkalyq aýrýhanaǵa sol aıaǵynyń qatty aýyrsynýyna shaǵymdanyp tústi, dep habarlaıdy QazAqparat tilshisi.
Ortalyq qalalyq klınıkalyq aýrýhananyń baspasóz qyzmetiniń málimetinshe, dárigerler patsıentke birneshe dıagnoz qoıǵan.
Atap aıtqanda, aıaǵynyń qan tamyrlarynyń tarylý aterosklerozy, sol jaǵynan jambas tamyrlarynyń ústiniń okklıýzııasy, sol jaq aıaǵynyń 4-satydaǵy sozylmaly ıshemııasy.
«Aýrý aıaqtaǵy qan aınalymynyń kúrdeli jetispeýshiligine ákeledi, naýqastardy qatty azapqa túsirip, adam óz betimen júre almaı qalady. Ókinishke qaraı, patsıentterdiń kóbi aıaǵy aýyrǵanda ony jas ereksheligine baılanysty bulshyq ettiń jaı ǵana álsizdenýi dep oılaıdy nemese aýrýdy aıaq sińiriniń túıilýi sekildi kók tamyrdaǵy problemaǵa uqsatady. Osylaısha, medıtsınalyq kómekke júginýdi artqa shegindirip tamyrynyń zaqymdaný satysyn tereńdete túspek. Mundaı jaǵdaıda patsıenttiń jambasynan bastap aıaǵyn kesý qaýpi tónip turdy, oǵan shuǵyl operatsııa jasaýǵa májbúr boldyq»,-deıdi qan tamyrlary júıesiniń hırýrgy Sultan Іleev.
Dárigerdiń aıtýynsha, mundaı dıagnozdyń kópke sozylýy aıaqtyń irińdep ketýi sebebinen kesip tastaýyna ákep soǵady.
Kesip tastaý qaýpi joǵary bolǵan kezde ólim deńgeıi 25%-ǵa ósedi.
Osymen qatar, patsıentterdiń 50% «krıtıkalyq ıshemııa» degen dıagnozdan soń aıaǵyn kespegen jaǵdaıdyń ózinde jyl aralyǵynda qaıtys bolady.
«Patsıentke tent jáne ballondy angıoplastık qoıyldy. Bul operatsııa shaǵyn ınvazıvti (az jaraqatty) sanalady jáne qan tamyryna úlken operatsııa jasaýdan aman alyp qalady, sondaı-aq, onyń bitelip qalǵanynda sozylmaly tamyr jetispeýshiliginiń oryn alýyna jol bermeıdi»,- deıdi dáriger.
Qazirgi ýaqytta naýqastyń jaǵdaıy jaqsy. Ony aýrýhanadan shyǵarýǵa daıyndap jatyr.
