Almatylyq dárigerler 42 jastaǵy áıeldiń ishinen 7,5 keli qurt alyp shyqty
ALMATY. QazAqparat - Almatylyq dárigerler áıeldiń ishinen salmaǵy 7,5 keli ehınokokk kıstasyn alyp tastady, dep habarlaıdy QazAqparat tilshisi.
№7 qalalyq klınıkalyq aýrýhanasynyń hırýrg dárigeri Musa Sahıpovtyń aıtýynsha, naýqas Almaty oblysynan kelgen.
« Patsıentte aýyrsyný, ózin jáısiz seziný sııaqty eshqandaı belgi bolmaǵan. Tek sońǵy jyldary 3-4 keli salmaq qosqan. Qazan aıynyń basynda allergııaǵa ushyraıdy. Sóıtip, ol kisi turǵylyqty jeri boıynsha terapevt dárigerine qaralady. Ýzı jasatady, sol ýaqytta baýyrynda ehınokokk bar ekeni anyqtalady»,- deıdi dáriger.
Áıeldiń ishindegi úlken ehınokokk kıstasyn almatylyq dárigerler alyp tastady.
« Operatsııany 26 qazan kúni jasadyq. Mundaı ehınokokk óte sırek kezdesedi. Áıeldiń ish qurylysyn túgel alyp jatyr. Onyń jarylyp ketý qaýpi óte joǵary boldy. Operatsııa kezinde baýyrdan 500 ml qan joǵalttyq. Bir doza qan quıdyq. Operatsııa kúrdeli bolǵandyqtan, toǵyz saǵatqa sozyldy»,- deıdi № 2 hırýrgııa bólimshesiniń meńgerýshisi Musa Sahıpov.
Naýqas eki kún jansaqtaý bóliminde jatty, qazir bólimshege aýysty. Ómirine qaýip joq.
