Almatylyq dárigerler 18,3 mlrd teńge kóleminde ústemaqy aldy

ALMATY. QazAqparat - 2021 jyldyń 6 aıynyń qorytyndysy boıynsha Almaty qalasynda epıdemııaǵa qarsy kúreske jumyldyrylǵan medıtsına qyzmetkerleri 1,8 mlrd teńge kóleminde ústemaqy aldy. Bul týraly «Áleýmettik medıtsınalyq saqtandyrý qory» KEAQ Almaty fılıalynyń dırektory Tileýhan Ábildaev aıtty, dep habarlaıdy QazAqparat tilshisi.

Onyń aıtýynsha, pandemııa bastalǵan 2020 jyldyń naýryzynan beri MSQ koronavırýs pen pnevmonııaǵa qarsy kúresip jatqan medıtsına qyzmetkerlerine ústemaqy tólep kele jatyr.

«Bıylǵy birinshi jartyjyldyqtyń qorytyndysy boıynsha KVI-men kúresip jatqan dárigerlerge 18,3 mlrd teńge ústemeaqy tólendi. Onyń ishinde eń qaýipti І toptaǵy 20 069 adamǵa – 12,6 mlrd teńge, qaýipi orta deńgeıdegi ІІ toptaǵy 12 804 adamǵa – 4,1 mlrd teńge, ІІІ toptaǵy 10 010 adamǵa – 1,6 mlrd teńge ústemaqy tólendi. Ústemeaqy tóleý boıynsha Ortalyq qordyń tarapynan tıesili adamdarǵa qarjy tóleý máselesi aıyna oryndalyp otyr»,-dedi ol.

Almaty qalasy boıynsha bıylǵy jyldyń birinshi jartysynda koronavırýsqa shaldyqqan syrqattardy emdeýge 15,8 mlrd teńge bólindi. 313 myń adam PTR test tapsyrǵan, oǵan 2,5 mlrd teńge tólendi.

Aıta keteıik, Qazaqstanda koronavırýs pen pnevmonııaǵa shaldyqqan naýqastar tegin emdeledi. Ol úshin saqtandyrylýy shart emes. Sonymen qatar, patsıentter COVID-19 juqtyrǵan jaǵdaıda mobıldi brıgadalar men úı jaǵdaıyndaǵy statsıonar qyzmetin paıdalana alady. 2021 jyldyń 1-shi jartysynda mobıldi brıgadalar 119 myńǵa jýyq shaqyrtýǵa bardy, oǵan 681,6 mln teńge tólendi.