Almatylyq dárigerler 15 jastaǵy qyzǵa kúrdeli operatsııa jasady

ALMATY. QazAqparat - Megapolıstegi №1 qalalyq klınıkalyq aýrýhana dárigerleri 15 jasar qyzdyń keýde qýysyna operatsııa jasady. Ota mindetti áleýmettik medıtsınalyq saqtandyrý esebinen qarjylandyryldy, dep habarlaıdy QazAqparat tilshisi.

Aýrýhana baspasóz qyzmetiniń málimetinshe, boıjetkendi sońǵy bir jylda jótel mazalaǵan. Dárigerler taǵaıyndaǵan antıbıotıkter kýrsy nátıje bermegen soń ony qosymsha tekserýge jibergen.

Flıýorografııa men keýde qýysyna jasalǵan kompıýterlik tomografııa keýde qýysynyń sol jaǵynda paıda bolǵan isikti kórsetti. Torakaldy hırýrgtar keńese kele patsıentti №1 aýrýhananyń torakaldy hırýrgııa ortalyǵyna josparly túrde jatqyzý týraly sheshim qabyldady.

Torakaldy hırýrgııa ortalyǵynyń meńgerýshisi Nurlan Jarylqapov, operatsııalyq blok meńgerýshisiniń mindetin atqarýshy Muhtar Nysanbaı, anestezıolog-reanımatolog Arman Alpysbaevtyń qatysýymen júrek pen kúretamyrǵa jaqyn ornalasqan isikti alyp tastady.

Eki saǵatqa sozylǵan ota sátti ótti. Operatsııa mindetti áleýmettik medıtsınalyq saqtandyrý aıasynda jasaldy.

Dáriger Muhtar Nysanbaıdyń aıtýynsha, torakaldy hırýrgııa ortalyǵynda keýde qýysyna, ókpeniń, traheıanyń, medıastınanyń, óńeshtiń, sút beziniń qatersiz isigine, sondaı-aq traheıa men bronhqa, keýde qýysynyń deformatsııalaryna operatsııalardyń keń spektrin jasaýǵa múmkindik bar.

Esterińizge sala keteıik, 18 jasqa deıingi balalar memleket tarapynan saqtandyrylǵan jáne tegin medıtsınalyq kómek ala alady.