Almatylyq dárigerler 102 jastaǵy keıýanaǵa ota jasady
ALMATY. QazAqparat – Jedel shuǵyl kómek kórsetý aýrýhanasynyń dárigerleri 102 jastaǵy keıýanaǵa ota jasady, dep habarlaıdy QazAqparat tilshisi.
Almaty qalalyq Qoǵamdyq densaýlyq saqtaý basqarmasynyń málimetinshe, 102 jastaǵy Anna Shestopalova san súıegi synyp, aýrýhanaǵa túsken. Keıýananyń jasyna qaramastan, travmatologtar oǵan ota jasaý týraly sheshim qabyldady.
«Biz alǵash ret jasy 100-den asqan naýqasqa ota jasadyq. Osydan birneshe jyl buryn 96 jastaǵy zeınetkerge ota jasaǵan edik, qazir ol 103 jasta ári densaýlyǵy jaqsy. Anna apamyz da jaqyndaryn qýantady dep úmittenemiz. Naýqastyń kóńil-kúıi jaqsy. Ota sátti ótti», - deıdi travmatologııa bóliminiń meńgerýshisi Vladımır Semenov.
Dárigerler jasy kelgen úlken kislerge ota jasaý qaýipti ári kúrdeli ekenin aıtady.
«Ádette mundaı otalar naýqastyń jasyna baılanysty qıyn jasalady. Biz operatsııa jasamas buryn naýqasty daıyndap, onyń ruqsatyn aldyq. Bári oıdaǵydaı ótti. Ota 35 mınýtqa sozyldy»,– deıdi travmatolog Ahmed Davreshov
Anna Shestopalova ómir boıy bastaýysh mektepte muǵalim bolyp jumys istegen. Búginde onyń úsh qyzynan taraǵan bes nemeresi jáne jeti shóberesi bar.
Eki ǵasyrdyń kýási bolǵan keıýana, uzaq ómir súrýiniń sebebin aıtty.
«Meniń uzaq ómir súrýimniń sebebi árdaıym meıirimdi bolýǵa tyrystym, eshqandaı adammen janjaldaspaı, barlyǵyna tek jaqsylyq tiledim, bárin jaqsy kórdim, durys tamaqtanyp, taza aýada kóbirek ýaqyt ótkizdim. Salaýatty ómir saltyn ustandym. Men ota jasatýdan qoryqpadym, - deıdi keıýana
Jalpy alǵanda, Almaty qalalyq jedel shuǵyl kómek kórsetý aýrýhanasynyń travmatologııa bólimshesinde jylyna ár túrli 1500-ǵa jýyq ota jasalady, dárigerler karantın kezeńinde kúrdeli qorǵanys sharalaryna qaramastan ota jasaýdy jalǵastyrdy.
