Almatylyq dáriger patsıenttiń qos tizesine bir mezgilde ota jasady

ALMATY. QazAqparat - Almaty qalasyndaǵy №4 aýrýhanada patsıenttiń qos tizesiniń býyny bir mezgilde aýystyryldy. Biregeı ota mindetti áleýmettik medıtsınalyq saqtandyrý paketi sheńberinde jasaldy, dep habarlaıdy QazAqparat tilshisi.

Vıktor Samýsenkonyń sol jaq aıaǵy tizesiniń aýyrǵanyna 25 jyldan asty.

Sońǵy jyldary oń aıaǵy da syrqyrap mazasyn ala bastaǵan. Emhanada jasaǵan konservatıvtik em-dom eshqandaı nátıje bermegen eken.

«Pyshaqqa túskim kelmeı talaı dári-dármek ishtim, jaqpamaı jaqtym, ýkol da saldyrdym. Ókinishke qaraı paıdasy shamaly boldy. Sońǵy kezde aýrýym janyma qatty batqan soń dárigerler býyn almastyrýdy usyndy», - deıdi Vıktor Samýsenko.

Dáriger Manarbek Áýbákirovtyń aıtýynsha, kóp jaǵdaıda dárigerler eki tizeniń býynyn qatar almastyrmaıdy.

Óıtkeni patsıent úshin kúrdeli operatsııanyń saldary da ońaıǵa soqpaıdy.

Dárigerdiń sózine súıensek, bul ota tehnıkalyq jaǵynan kúrdeli bolǵanymen, onyń birqatar artyqshylyqtary da bar.

«Máselen, patsıent qaıta-qaıta tekserýden ótpeıdi, narkozdy da azyraq alady. Eń bastysy, operatsııadan keıingi reabılıtatsııa ýaqyty qysqarady. Bir jaǵynan, eki tizege birdeı operatsııa jasalǵanda adam aǵzasyna aıtarlyqtaı kúsh túsedi. Sondyqtan mundaı otany aýyr sozylmaly aýrýlarǵa shaldyqpaǵan, jastar men orta jastaǵy adamdarǵa ǵana jasaımyz. Sebebi aıaqty teńshep, qımyl-qozǵalys bıomehanıkasyn qalpyna keltirý ońaı emes», - deıdi dáriger Manarbek Áýbákirov.

Aıtýynsha, eki tizege birdeı ota jasaý týraly sheshimdi dáriger men patsıent birge otyryp, ábden talqylap baryp qabyldaıdy.

Biraq Vıktor Samýsenkonyń jasyna qaramastan ota sátti jasaldy deıdi maman.

«Býyn almastyrýdyń jalpy quny 1,5 mln teńgeden bastalatyn joǵary tehnologııalyq operatsııalar qataryna jatady. Endoprotezdeý sońǵy jyldary kóp jasalyp júrgen manıpýlıatsııalardyń biri. Sebebi ol býyny aýyratyn syrqattyń aýrýyn jeńildetip, emin-erkin júrip-turýyna múmkindik beredi»,- dedi ol.