Almatylyq dáriger koronavırýs pen týberkýlezdi qalaı ajyratý kerektigin aıtty
Dárigerdiń aıtýynsha, klınıkalyq túrde týberkýlez koronavırýs ınfektsııasynan túr aıyrmshalyǵy joq.
«Týberkýlez kezinde, COVID-19 ınfektsııasy sekildi ókpe zaqymdanady, jótel, dene qyzýy, entigý paıda bolady, keıbir jaǵdaıda qan qaqyrady. Tekseriske deıingi aıyrmashylyqty qaqyryqty alýmen jáne PTR testi analızderi arqyly ǵana bilýge bolady. COVID-19 ınfektsııasy kezinde jótel lezde paıda bolmaıdy, eń aldymen, dene qyzýy kóterilip, ıis sezý qabileti joǵalady, entigedi, eger týberkýlez kezinde joǵaryda atalyp ótken barlyq belgilerge eń negizgi belgi bolyp jótel qosylsa, munda eń aldymen ókpe zaqymdanady»,- deıdi Qaragóz Ótemuratova.
Spıkerdiń sózinshe, COVID-19 kezinde ókpeni vırýs zaqymdasa, týberkýlezda bakterııa.
« COVID-19 ınfektsııasy men týberkýlezdiń arasyndaǵy aıryqsha belgi- bul árıne emdelýdi ári qaraı jalǵastyrý. Koronavırýs ınfektsııasy 2-3 apta, eń uzaq degende bir aı emdeledi. Týberkýlez buǵan qaraǵanda uzaǵyraq- eń azy 18 aıdan 3 jylǵa deıin. Sondaı-aq, emdelý úderisinde aıyrmashylyq bar. KVI kezinde 1-2 ǵana tabletka jáne ınektsııa alsa, týberkýlezda 1-2 bakterııaǵa qarsy ýkol jáne osyǵan qosa uzaq ýaqytqa deıin 20-25 tabletka qabyldaıdy»,- deıdi ol.
Týberkýlezdi kelesideı 4 zertteý ádisimen anyqtaýǵa bolady: bakterıologııalyq (materıal men jasýshaly zertteýdi, ıaǵnı, materıaldyń sebindisin mıkroskopppen qaraý), molekýlıarlyq-genetıkalyq shuǵyl ádispen (GeneXpert, Haın-test), rentgenologııalyq jáne týberkýlınodıagnostıkamen (Mantý synamasy).
«Bizdiń emhanada týberkýlezdi anyqtaý úshin barlyq qajetti zattar qaralǵan. Eń birinshi, fıltr kabınetter jáne qaqyryq alynatyn ftızıokabınet. Bul kabınetter jalpy kire beristen bólek ornalasqan. Munda KVI belgileri bar jáne 2 aptadan asa jóteli bar patsıentterdiń alǵashqy dıagnostıkasy júrgiziledi»,- dedi dáriger.
Eger adamda týberkýlezdiń ashyq túri anyqtalsa, naýqas týberkýlezge qarsy dıspanserge jatqyzylady, onda ol 3 aı boıy em alady, sodan keıin ambýlatorııalyq negizde emin jalǵastyrady.
Jabyq túri bolsa – naýqas ambýlatorlyq em qabyldaıdy.
«Týberkýlezben aýyratyndar aptasyna bir ret bizdiń emhanaǵa kelip, dárilerin alady. Ol dáriler arnaıy ydysqa salynyp beriledi. Týberkýlez de koronavırýs sııaqty aýa tamshylary arqyly taralady, sondyqtan barlyq qaýipsizdik sharalaryn saqtaý kerek», - dep túıindedi Qaragóz Ótemuratova.