Almatylyq dáriger koronavırýs belgileri anyqtalǵan jaǵdaıda óz betinshe emdelmeýge shaqyrdy
ALMATY. QazAqparat – «Jas Qanat» bastapqy medıtsınalyq-sanıtarlyq kómek ortalyǵynyń» jalpy tájirıbe dárigeri Merýert Kóshenova onlaın brıfıng barysynda almatylyqtardy koronavırýs belgileri anyqtalǵan jaǵdaıda óz betinshe emdelmeýge shaqyrdy, dep habarlaıdy QazAqparat tilshisi.
«Úı jaǵdaıynda ózderińizge em-dom jasamańyzdar. Eger dene qyzýynyń kóterilýi, tamaqtyń, keýde qýysynyń aýyrýy, jótel jáne t.b. belgiler paıda bolsa, dereý tirkeý orny boıynsha emhanaǵa medıtsınalyq kómekke júginińiz. Sımptomdardy eleýsiz qaldyrýǵa bolmaıdy. Eger dıspanserlik esepte tursańyz, únemi tekserýden ótip, emdeýshi dárigerdiń taǵaıyndaýlaryn qabyldaǵan jón», – deıdi dáriger.
Merýert Kóshenovanyń aıtýynsha, epıdemııa bastalǵannan beri «Jas Qanat» emhanasyna COVID-19-dyń sımptomsyz túrimen 145 naýqas, jeńil túrimen 98 naýqas baqylaýda boldy, shamamen 80-i aýrýhanaǵa jatqyzyldy. Ambýlatorııalyq kezeńde koronavırýs ınfektsııasy bar 243 naýqas emdelip shyqty.
«Jalpy, bıylǵy jyly fıltrge júgingen adamdardyń sany artty. Maýsym-shilde aılarynda emhanaǵa kúnine 40 adamǵa deıin kelip, kún saıyn 30-ǵa jýyq úıge shaqyrtýlar boldy. Mobıldi toptyń dárigerleri 250 patsıentke úıinde qyzmet kórsetti»,– deıdi Merýert Kóshenova.
