Almatylyq boıjetken quzǵa qulap, mert boldy
ALMATY. QazAqparat - Almatyda Nursultan shyńynyń eteginde serýenge shyqqan qyz quzǵa qulap, mert boldy, dep habarlaıdy QazAqparat tilshisi.
Qyz taýǵa arnaıy saqtandyrý quraldarynsyz shyqqan.
Tótenshe jaǵdaı keshe keshki saǵat 19.00 shamasynda bolǵan.
QR ІІM TJK resmı ókili Rýslan Imanqulovtyń aıtýynsha, respýblıkalyq jedel qutqarý jasaǵynyń kezekshisine er adam habarlasqan. Ol Nursultan shyńynyń eteginen qyzdyń qulap ketkenin aıtqan.
Qutqarý jasaǵy shuǵyl túrde Talǵar asýyna deıin jetip, Bogdanovıch muzdyǵynda jigitpen kezdesip, ary qaraı kóterilgen.
«Jigit pen qyz ekeýi taýǵa birge shyqqan. «Shymbulaq» taý shańǵysy kýrortynan Nursultan shyńyna bet alǵan. Týrısterdiń qajetti kıimderi, qural jabdyqtary bolmaǵan. Ekeýi de kúrdelilik deńgeıi 2B bolatyn marshrýtpen júrgen. Bul jolmen júrý úshin alpınıstik qural-jabdyq, fızıkalyq, psıhologııalyq daıyndyq kerek. Boıjetken Nursultan shyńynyń eteginde quzǵa qulap ketken», - deıdi R.Imanqulov.
Qutqarýshylar kelgende boıjetken jantásilim etken.
Tańǵy 6.20 shamasynda qutqarýshylar qyzdyń denesin polıtsııaǵa tapsyrdy.
QR ІІM TJK resmı ókili Rýslan Imanqulov taýǵa shyqqan adamdardy qaýipsizdik sharalaryn qatań saqtaýǵa shaqyrdy.
«Taýǵa túngi ýaqytta shyǵýǵa bolmaıdy. Shynyqpaǵan, daıyndyǵy joq adamdar úshin taý quzdary óte qaýipti. Taý asýlarynan tańǵy ýaqytta asyp úlgergen durys. Daıyndyǵy az adamdar uzynyraq ári qaýipsiz marshrýt tańdaǵany jón», - deıdi Rýslan Imanqulov.
