Almatylyq boıjetken erekshe vıdeolarymen jurtty tańqaldyrdy
ALMATY. QazAqparat – Jubymen birge bıik ǵımarattyń ústinde túsken almatylyq boıjetkenniń vıdeosy jelide keń taralyp, áp-sátte áıgili bola bastady. Ol QazAqparat tilshisine óziniń osy hobbıi týraly aıtyp berdi.
«Men Almaty qalasynda turamyn. Sýretshi ári trevel-blogermin. Jasym qupııa bolyp qalsyn. Bul vıdeoǵa jigitimmen birge tústim», - dedi Angela Nıkolaý.
Ol Esentai Tower bıznes-ortalyǵynyń tóbesinde túsirilgen vıdeony aıtyp otyr. Beınejazbanyń sátti túsirilgenin de atap ótti.
«Jigitim ekeýmiz tańerteń erte kúnniń shyqqanyn túsirý úshin Esentai Tower-dyń tóbesine kóterildik. Vıdeomyz sátti túsirildi jáne bul vıdeo jelide áli de tanymal. Jalpy, buǵan deıin «Nurly taý» ortalyǵynyń tóbesinde túsirilgen vıdeomyz da kóp pablıkterge shyqqan edi», - dedi trevel-bloger.
Aıtýynsha, bıik ǵımarattardyń tóbesine shyǵyp, vıdeo túsirý - onyń hobbıi. Súıikti isimen kóp jyldan beri aınalysady jáne bıiktikten múldem qoryqpaıdy.
«Men álemdi aralap, saıahattap júremin. Sol kezde jer betindegi eń bıik ári áıgili ǵımarattardyń tóbesine shyǵyp, vıdeo túsirem. Bul - meniń hobbıim. Onymen aınalysyp júrgenime 7 jyldan asty. Men odan qoryqpaımyn. Aıta keteıin, bıikke shyqqanymda eshqandaı qosalqy saqtandyrǵysh qural-saımandardy qoldanbaımyn», - dedi ol.
