Almatylyq bıznesmender Astana qarjy ortalyǵyna qalaı tirkeledi
ALMATY. QazAqparat - Almatyda halyqaralyq ınvestorlar aptalyǵy - WIW 2018 aıasynda «Astana halyqaralyq qarjy ortalyǵy» (AHQO) Financial Literacy Roadshow sharasyn ótkizip jatyr, dep habarlaıdy QazAqparat tilshisi.
Búgin AHQO mamandary bıznes qaýymdastyq pen kásipkerler arasynda ortalyqty tanystyrý sharasyn júrgizdi.
Bul shara qarjylyq jáne ınvestıtsııalyq mádenıetti qalyptastyrý maqsatynda uıymdastyryldy.
AHQO mamandary qarjylyq qyzmetterdi retteý, qarjy tehnologııalary, jasyl jáne ıslam oblıgatsııalaryn shyǵarý, naryqta qundy qaǵazdardy ınvestıtsııalaý salasyndaǵy ortalyqtyń múmkindikteri týraly aıtyp berdi.
«Biz bıznes qaýymdastyqty jınap Astana halyqaralyq qarjy ortalyǵyna qalaı tirkeýge bolatynyn, ol úshin ne kerek ekenin, lıtsenzııalaý týraly aıtyp jatyrmyz. Ortalyqta tirkelgen bıznes ókilderine ol qandaı jeńildik beretini anyqtaldy. Búgin úsh taqyryp: jasyl qarjy, ıslam qarjylyq júıeleri, FinTech týraly aıtylady», - dedi Astana halyqaralyq qarjylyq ortalyǵy əkimshiligi» AQ basqarýshy dırektory Ernur Rysmaǵambetov.
Kelýshiler Astana qarjylyq ortalyǵynyń ashylyp qaıta jabylyp qalǵan Almaty qarjy ortalyǵyna qandaı aıyrmashylyǵy baryn surady.
«Bizge komandalar eki sebeppen keledi. Birinshisi, salyqtan bosaý, bul jeńildik tek qarjy salasyndaǵy komandalarǵa qatysty. Ekinshi sebep, bizde aǵylshyn quqyǵy keńistigi bar. Kez kelgen komandaǵa zań, býhgalterııa, aýdıtorlyq, konsaltıngtik salada 10-15 túrli qyzmet túri kerek», - dedi ol.
Sonymen qatar, onyń aıtýynsha, AHQO da tirkelý úshin talap óte joǵary.
«Barlyq erejeler, normalar men retteý sharalary eki qaǵıdaǵa tazalyq pen móldirlikke qurylǵan»,- dedi AHQO ókili Serdar Gıýner.
Aıta ketý kerek, álemniń 80-nen astam elinde halyqaralyq ınvestorlar aptalyǵy - WIW 2018 bastalady. Bul sharany halyqaralyq qundy qaǵazdar komıssııasy uıymy ótkizedi. Bir aptaǵa sozylatyn shara barysynda 80-ge tarta qarjylyq retteýshi kompanııa men naryq qatysýshylary qarjylyq saýattylyq, ınvestıtsııa jasaý týraly túrli shara ótkizedi.
Ǵalamdyq WIW 2018 bastamasynyń aıasynda «Astana» halyqaralyq qarjy ortalyǵy Astana, Almaty, Shymkent, Qaraǵandy, Qostanaı qalalarynda halyqtyń ıvestıtsııalyq saýattylyǵyn arttyrýǵa baǵyttalǵan sharalar tizbegin daıyndady. Onyń biri búgin tańerteń KIMEP ýnıversıtetiniń stýdentter arasynda ótti.
