Almatylyq bankırdi óltirgenderge qatysty sot úkimi jarııa etildi
ALMATY. QazAqparat - Búgin qylmystyq ister jónindegi mamandandyrylǵan aýdanaralyq sotynda Almatydaǵy bankterdiń birinde qyzmet etken Nurshat Rozıevtiń ólimine qatysty qylmystyq istiń úkimi jarııa etildi, dep habarlaıdy QazAqparat tilshisi.
Tergeý málimetterinde aıyptalýshylar Jandos Baızaqov pen Aslan Raıbaev Rozıevtiń jol-kólik apatyna ushyraǵanyn kórip, bul oqıǵany jasyryp qalatyndaryn aıtyp, sol úshin aqsha talap etken. Alaıda, jábirlenýshi Rozıevtiń ákesi zaqymdanǵan kólik ıesine ózderi habarlasyp, shyǵynyn ótep bergenin jetkizgen. Aıyptalýshylar qoqan-loqqy kórsetip, talap etken aqshany bere almaıtynyn aıtqan.
Bul is boıynsha sot Baızaqov qylmysty jalǵyz ózi jasaǵanyn anyqtap, oǵan qatań rejimdegi túzeý kolonııasynda 14 jylǵa bas bostandyǵynan aıyrý jazasyn taǵaıyndady. Sonymen qatar, úkim boıynsha onyń jeke múlki tárkilenedi. Al, onyń janynda bolǵan Aslan Raıbaev jeke múlki tárkilene otyryp, 9 jylǵa bas bostandyǵynan aıyryldy. Ol jazasyn jalpy rejimdegi túzeý kolonııasynda óteıdi.
Sot úkimi zańdy kúshine engen joq. Jábirlenýshiniń týystary taǵaıyndalǵan jazaǵa qatysty shaǵym keltirmek.
Eske sala keteıik, Nurshat Rozıev 2016 jyldyń 3 qyrkúıeginde joǵalyp ketti. Ol turǵan úı jartylaı órtenip ketken. Nissan Primera markaly kóligi úıdiń aýlasynda joq bolyp shyqqan. Keıin onyń múrdesi ózen jaǵasynan tabyldy.
