Almatylyq arý Anglııada jyldyń úzdik sýasty fotograftarynyń biri atandy
ASTANA. QazAqparat - Almaty qalasynyń turǵyny Nadejda Kýlagına túsirgen fotografııa «Jyldyń úzdik sýasty fotografy» atty brıtandyq baıqaýda «Sýǵa batqan keme» atalymy boıynsha 4 jáne 6-oryn aldy, dep habarlaıdy QazAqparat.
«Underwater Photographer of the Year» sýasty fotografııasy halyqaralyq baıqaýynyń qazylar alqasy 2017 jylǵy jeńimpazdardy atady. Eń úzdik túsirilimder qatarynda qazaqstandyq Nadejda Kýlagınanyń túsirgen fotosy da bar. Ol sońǵy 7 jyl boıy sý astynda sýretke túsirýmen áýestenip júr. Nadejdanyń mamandyǵy aýdarmashy. Ótken jyly ol áriptesterimen birge Sýdanǵa baryp, Qyzyl teńizdiń túbine súńgip qaıtqan bolatyn. Solardyń birin ol sýǵa batqan ıtalıandyq «Ýmbrııa» kemesin zertteýge arnady.
Onyń «Elester bar bólme» atty sýreti «Sýǵa batqan keme» atalymynda 4-oryn ıelendi.
Qazylar alqasynyń nazaryn sý astyndaǵy keme ishi men oǵan tereze arqyly túsken kún sáýlesi beınelengen óli tynyshtyq jaǵdaı aýdarǵan.
«Batyp ketken keme sýreti aıryqsha tańdanys týdyrady. Ásirese kún sáýleleriniń ornalasý reti barynsha tartymdy. Avtor óz sýretinde sáýle men kóleńke oıynyn tamasha kórsete alǵan», - dedi qazylar alqasynyń múshesi Martın Edj.
«Sýǵa batyp ketip, qaıyrlap búıirimen jatqan kemeden meniń nazaryma kún sáýlesi túsip turǵan sol bólme ilikti. Illıýmınator arqyly syzdyqtaı túsken sáýle tylsym jaǵdaı týyndata otyryp, óte ádemi kórindi. Múmkinshilikti qalt jibermeı sýretke túsirip aldym», - dedi Nadejda ózi túsirgen sýret jaıynda.
Onyń aıtýynsha, baıqaýǵa álemniń 67 elinen fotograf qatysqan.
Aıta keteıik, 1965 jyly Uybrıtanııada Bernard Iton «Underwater Photographer of the Year» baıqaýynyń negizin qalaǵan bolatyn.
