Almatylyq apasynan 90 mln teńge urlap, 6 jylǵa sottaldy
ALMATY. QazAqparat - Almaty qalasy №2 Medeý aýdandyq sotynda K.-nyń asa iri kólemde urlyq jasaýyna baılanysty qylmystyq is qaraldy, dep «QazAqparat» HAA tilshisi sottyń baspasóz qyzmetine silteme jasaı otyryp habarlaıdy.
Er kisi týǵan apasynan mıllıondaǵan teńge, myńdaǵan dollar, rýbl, japondyq ıen, 160 aǵylshyn fýnt sterlıngin jáne baǵaly zattardy urlaǵan. Urlanǵan múlik 90 mln teńgeden astam somany quraıdy.
«Sot 2016 jyldyń maýsym aıynda K.-nyń N. esimdi apasynyń páteri kiltiniń telnusqasyn alyp, sondaı-aq materıaldyq kirisiniń jaqsy ekenin bilip, asa iri kólemde bireýdiń múlkine qol suǵýǵa sheshim qabyldaǵanyn anyqtaǵan. Er kisi 2016 jyldyń 7 maýsymy kúni saǵat 16:00-de apasynyń úıine kelip, dabyl júıesin óshirip, 22 mln.teńge, 200 myń dollar, 9 myń reseı rýbli, 1050 eýro, 3 myń ıen, 160 aǵylshyn fýnt sterlıngi men baǵaly zattaryn qoldy etken. Materıaldyq zııan 90 886 000 teńgeni quraıdy», - dep aıtylady habarlamada.
Sottyń sheshimimen, K. Qazaqstan Respýblıkasy QK 188 babynyń 4 bólimi, 3 tarmaǵynda kórsetilgen qylmysqa oraı aıypty dep tanylyp, 6 jylǵa bas bostandyǵynan aıyryldy. Múlki tárkilenip, jalpy rejimdi túzetý kolonııasynda aıybyn óteıtin bolady. Úkim zańdy kúshine engen joq.
