Almatylyq ana 7 jyl buryn iz-túzsiz ketken ulynyń qabirin tapty
ALMATY. QazAqparat - 7 jyl buryn iz-túzsiz ketken balasyna izdeý salǵan ana qaıǵyly habarǵa tap boldy, dep habarlaıdy QazAqparat tilshisi.
«Ony adamdar aýrýhanaǵa jetkizgende baýyr tsırrozynyń ustamasy janyn qınaǵan. Keıin aýrýhanada jan tapsyrǵan. Olar (dárigerler) birneshe kún kútken, biraq onyń janynda eshqandaı qujattary bolmaǵan. Keıin ony jerlegen», - deıdi 7 jyl buryn habar-osharsyz ketken Aıdar Kishibaevtyń anasy Alıma Skagıeva QazAqparat tilshisine telefon arqyly bergen suhbatynda.
Onyń sózine qaraǵanda, uly habar-osharsyz ketip, biraz ýaqyttan keıin qaıtys bolǵan. Keıýananyń aıtýynsha, oǵan polıtsııa qyzmetkerleri kelip, nelikten osynshama jyldar boıy habarlaspaǵanyn suraǵan.
«Men keshe ǵana polıtsııaǵa bardym. Maǵan jarty saǵatta bárin taýyp berdi. Polıtsııa, medıtsına qyzmetkerlerine ony tabýǵa kómekteskeni úshin alǵys aıtamyn. Eń bolmaǵanda ulymnyń basyna baryp, Quran oqı aldyq», - deıdi keıýana.
Eske sala keteıik, buǵan deıin Almaty turǵyny 7 jyl buryn iz-túzsiz ketken ulyna izdeý salǵany týraly habarlaǵan bolatynbyz.
Áıeldiń aıtýynsha, ol «Jdı menıa», «Barmysyń, baýyrym?» baǵdarlamalarynyń kómegine júgingen. Alaıda quqyq qorǵaý organdaryna ótinish jazbaǵan.
