Almatylyq alma baǵyn otap, ornyna úı salmaq boldy

ALMATY. QazAqparat - Jaqynda Medeý aýdanynda alma aǵashtaryn zańsyz kesý deregi anyqtaldy. Almaty turǵyny ol jerge jeke turǵyn úı salmaq bolǵan, dep habarlaıdy QazAqparat tilshisi.

«Jaqynda taý bókterinde ornalasqan bir ýchaskede alma baǵyn zańsyz kesý faktisi anyqtaldy. Maqsat – ornyna jeke turǵyn úı salý boldy. Búginde Medeý aýdandyq polıtsııa basqarmasy QR QK-niń 340-baby «Aǵashtar men butalardy zańsyz kesý, joıý nemese zaqymdaý» boıynsha qylmystyq is qozǵady», - dedi brıfıng barysynda qalalyq jasyl ekonomıka basqarma basshysynyń orynbasary Ulan Abdýldaev.

Spıkerdiń sózinshe, bul jer ýchaskesi buryn Almaty oblysyna tıesili bolǵan. 2014 jyldan bastap Almaty qalasynyń menshiginde. Buǵan deıin Almatydaǵy «Kamenskoe plato» observatorııasynyń janynda alma aǵashtary zańsyz otalyp, qurylys bastalǵany týraly aqparat áleýmettik jelide tarady. Keıin Almaty qalasy jasyl ekonomıka basqarmasynyń qyzmetkerleri Medeý aýdandyq polıtsııa basqarmasymen, sondaı-aq mamandandyrylǵan tabıǵat qorǵaý prokýratýrasymen birlesip, jedel túrde oqıǵa ornyna bardy. Tekserýge barǵan kezde 21 alma aǵashynyń kesilgeni rastaldy. Tekserý aktisi jasalyp, 500 AEK shyǵyn eseptelip, tıisti sharalar qabyldaý úshin polıtsııa departamentine hat joldandy.