Almatylyq alaıaqtar túlekterden aldap 32 mln teńge alǵan
ALMATY. QazAqparat - Almatylyq alaıaqtar túlekterden aldap 32 mln teńge alǵan, dep habarlaıdy QazAqparat tilshisi.
Kúdiktiler túlekterdi grantqa nemese syrttaı bólimge túsirip beremiz dep aldap, sol úshin aqy alyp otyrǵan.
Qalalyq sottyń baspasóz hatshysy Dıas Mahambetovtiń aıtýynsha, olardyń áreketi Almaly aýdandyq sotynda qaralyp jatyr.
«Qazirgi tańda B.Uzaqbaev pen A.Mahabaevqa qatysty QR QK 190-babynyń 2-bólimine, 190-babynyń 3-bólimine sáıkes qylmystyq is qaralyp jatyr. Sottalýshylarǵa asa iri kólemde alaıaqtyq jasady degen aıyp taǵyldy», - dedi D.Mahambetov.
Іs materıaldaryna sáıkes, kúdiktiler 9 jyl boıy túlekterdi aldap kelgen. Olar ózderin Tynyshpaev atyndaǵy Qazaq kólik jáne kommýnıkatsııa akademııasynyń, Qazaq jol jáne habarlama ýnıversıtetiniń, Qonaev atyndaǵy Akademııanyń qyzmetkeri retinde tanystyryp, grantqa nemese syrttaı bólimge oqýǵa túsirýge ýáde bergen. Sondaı-aq, olar emtıhan men dıplom qorǵaýda da kómektesemiz degen. Bul «qyzmeti» úshin olar 32,7 mln teńge alyp úlgergen.
