Almatylyq 40 myń bala sport sektsııalaryna tegin qatysa alady
ALMATY. QazAqparat - Almatylyq 40 myń bala sport sektsııalaryna tegin qatysa alady. Bul týraly Baqytjan Saǵyntaev Memleket basshysynyń Joldaýyn iske asyrýǵa arnalǵan qalanyń aktıvinde málim etti, dep habarlaıdy QazAqparat tilshisi.
Ákimniń aıtýynsha, qalada 40 myń bala sport sektsııalaryna tegin qatysady. Ol úshin bıýdjetten 1,5 mıllıard teńge bólindi.
Megapolıstiń barlyq aýdanynda tegin sport sektsııalary men úıirmesi bar 50 demalys ortalyqtary jumys isteıdi, onda 5,2 myńnan astam adam qamtylǵan.
« Qazir jeti sporttyq nysannyń qurylysy júrgizilýde. Atap aıtar bolsam, 6 deneshynyqtyrý-saýyqtyrý kesheni men tennıs ortalyǵy. Jekemenshik uıymdar bes úlken sport nysanyn salyp jatyr. Bul ústel tennısiniń ortalyǵy, «Suńqar» HShTK kesheni, «Juldyz» shaǵynaýdanyndaǵy DSK, «Maı vın» DSK, Áýezov aýdanyndaǵy sporttyq kúres ortalyǵy, «Jan dosym» tennıs ortalyǵy»,- dedi ákim.
Sonymen qatar, Atletıkalyq aýyldyń janynan jabyq jeńil atletıkalyq manej salý josparda.
«Jan basyna shaqqanda tıimdi qarjylandyrýdy damytý, bıýdjet qarjysyn paıdalanýdyń tıimdiligin arttyrý, sporttyq ınvestıtsııa aǵynyn yntalandyrý, materıaldyq-tehnıkalyq bazany nyǵaıtý, jattyqtyrýshylar quramy men kadrlardy damytý jáne talanttardy qoldaý – bizdiń aldymyzda turǵan basty mindetter», – dep atap ótti Baqytjan Saǵyntaev.
